«Վաղը, ինձ թվում է, կավարտվի ճակատամարտը Շուշիի համար». Արծրուն Հովհաննիսյան (ՎԻԴԵՈ)

ԵՐԵՎԱՆ, 8 նոյեմբերի./Նովոստի–Արմենիա/. ՀՀ ՊՆ ներկայացուցիչ Արծրուն Հովհաննիսյանը Հանրային հեռուստաընկերության եթերում անդրադարձել է Շուշիի համար մղվող պայքարին։

«Շուշիի համար առանձին ճակատամարտը, որը 3–4 օր արդեն անդադար ընթանում է տարբեր փուլերով, տարբեր հաջողությունների և անհաջողությունների տատանումներով, վաղը իմ կարծիքով, վերջնական պարզ կլինի։ Չեմ ուզում վաղաժամ հստակ գնահատական տալ, իրավիճակը շատ արագ փոխվում է, վաղը ամեն ինչ պարզ կլինի։ Վաղը, ինձ թվում է, կավարտվի ճակատամարտը Շուշիի համար», – ասաց նա։

Հովհաննիսյանը կոչ արեց չտալ վաղաժամ ոչ վատատեսական, ոչ լավատեսական գնահատականներ Շուշիի համար, այլ վստահել հայկական զորքին, որն ամբողջ օրը վարել է համառ և գրագետ պայքար։

«Եթե հարցը վերաբերվում է Շուշիի պատկանելիությանը, Շուշին միշտ էլ հայկական հող է եղել, հայկական քաղաք։ Եթե խոսքը ռազմական գործողությունների մասին է, դրանք այս պահին ընթանում են Շուշիի ներսում և Շուշիի շրջակայքում, մեր զորքերը հերոսական պայքար են մղում` Շուշին պաշտպանելու և որոշ դիրքեր, որտեղ հայտնվել են ադրբեջանական, վարձկան ուժերը, դրանց չեզոքացնելու և լիարժեք վերահսկողությունը մեր ձեռքը վերադարձնելու ուղղությամբ», – հայտարարեց նա։

Նա տեղեկացրեց, որ հիմա բարդ է ասել, թե ով է վերահսկում այդ տարածք. ամբողջ ցերեկը վաղ առավոտից համառ մարտեր են եղել և դժվար է ասել, թե ումն է նախաձեռնությունը։

«Իրենք երեկ ցերեկը, երեկ գիշերը սկսել էին մեծ խմբերով ներթափանցել քաղաք։ Եվ մերոնք, կատարելով վերախմբավորում, հակառակ գործողություններ են արել։ Այսինքն չկա կողմ, որը որ ունի լիարժեք վերահսկողություն և չունի լիարժեք նախաձեռնողականություն քաղաքի և տարածքների վերահսկողության նկատմամբ։ Բայց ինձ թվում է, որ իրենք չէին պատկերացնում, որ մենք այդպես համառ կդիմադրեինք կոնկրետ Շուշիի համար, քանի որ Շուշին մեզ համար շատ թանկ է», – ասաց նա։–0–