Սարգսյանը Թուրքիային անվանել է ԼՂ հակամարտության «երրորդ կողմ», ՆԱՏՕ–ի գլխավոր քարտուղարը հիշեցրել է, որ ՆԱՏՕ–ն այս հակամարտության մաս չի կազմում (ՎԻԴԵՈ)

ԵՐԵՎԱՆ, 22 հոկտեմբերի./Նովոստի–Արմենիա/. ՆԱՏՕ-ի գլխավոր քարտուղար Յենս Ստոլտենբերգը Բրյուսելում ՀՀ նախագահ Արմեն Սարգսյանի հետ հանդիպման ժամանակ անհանգստություն է հայտնել իրավիճակի վերաբերյալ և առանձնապես՝ քաղաքացիական բնակչությանը թիրախավորելու առնչությամբ՝ հույս հայտնելով, որ կողմերը կհարգեն հրադադարի վերաբերյալ պայմանավորվածությունները և կվերադառնան ԵԱՀԿ Մինսկի խմբի համանախագահությամբ բանակցային սեղանի շուրջ։

«Հայաստանն ու Ադրբեջանը պետք է վերսկսեն բանակցությունները՝ հասնելու Լեռնային Ղարաբաղի հակամարտության խաղաղ կարգավորմանը։ ԵԱՀԿ Մինսկի խմբի համանախագահների ջանքերը շարունակում են լինել կարևոր», – ասել է Յենս Ստոլտենբերգը Բրյուսելում գտնվող ՆԱՏՕ–ի կենտրոնակայանում։

Դաշինքի գլխավոր քարտուղարը հայտարարել է, որ ՀՀ նախագահի հետ քննարկումների ժամանակ նա հիշեցրել է, որ ՆԱՏՕ-ն այս հակամարտության մաս չի կազմում։

«Թե՛ Հայաստանը, թե՛ Ադրբեջանը ՆԱՏՕ-ի արժեքավոր գործընկերներ են ավելի քան 25 տարի։ ՆԱՏՕ-ն խորապես մտահոգված է հրադադարի շարունակվող խախտումներով, որոնք մարդկային կյանքեր են խլել», – հայտարարել է ՆԱՏՕ–ի գլխավոր քարտուղարը։

Նրա խոսքով, ՆԱՏՕ-ի և միջազգային անվտանգության համար կարևոր է, որ ռազմական գործողությունները դադարեցվեն, դադարեն տառապանքներն, ու գտնվի խաղաղ կարգավորում։

«Կենսական կարևորություն ունի այն, որ բոլոր կողմերն այժմ զսպվածություն ցուցաբերեն, հետևեն հրադադարին և լարվածության թուլացմանը», – ընդգծել է դաշինքի գլխավոր քարտուղարը։

ՀՀ նախագահն իր հերթին նշել է, որ հակամարտության երրորդ կողմը ՆԱՏՕ-ի անդամ է։

«Լինելով ՆԱՏՕ-ի կենտրոնակայանում՝ կցանկանայի այստեղ իմ մտահոգությունները հայտնել, որովհետև, ցավոք, շատ վերլուծաբաններ և նրանք, ովքեր մոտիկից են հետևում Լեռնային Ղարաբաղի հակամարտությանը, հիմա, երբ այն վերսկսվել է որպես պատերազմ, ասում են, որ այն այլևս հակամարտություն չէ Արցախի Հանրապետության կամ Լեռնային Ղարաբաղի ժողովրդի և Ադրբեջանի միջև, այլ այնտեղ կա երրորդ կողմ, որը քաղաքական, դիվանագիտական և ռազմական աջակցություն է ցուցաբերում Ադրբեջանին», – ընդգծել է ՀՀ նախագահը։

Նրա խոսքով, այդ երրորդ կողմը (Թուրքիան, խմբգր.) աջակցել և այս տարածաշրջան է բերել իսլամիստ ահաբեկիչների։

«Կարծում եմ, որ ՆԱՏՕ-ի անդամ երկիրը՝ Թուրքիան, պետք է դադարի լինել այս հակամարտության մաս և հավատարիմ մնա հրադադարին, հասկանա, որ պետք է գտնվի խաղաղ լուծում։ Այդ դեպքում, կարծում եմ, հրադադար կհաստատվի, և դրանից հետո մենք կկարողանանք վերադառնալ բանակցությունների սեղանի շուրջ՝ Մինսկի խմբի միջնորդությամբ, և, ի վերջո, կգտնենք հակամարտության խաղաղ լուծում», – ընդգծել է ՀՀ նախագահ Արմեն Սարգսյանը։–0–