Պատմամշակութային ժառանգությունն որևէ նշանակություն չունի քաղաքականության ու հայրենատիրության հարցերում. Արցախի ՄԻՊ–ը` Տիգրանակերտի մասին (ՖՈՏՈ)

ԵՐԵՎԱՆ, 19 նոյեմբերի./Նովոստի–Արմենիա/. Արցախի մարդու իրավունքների պաշտպան Արտակ Բեգլարյանն այսօր այցելել է Տիգրանակերտ և Մարտակերտի շրջանի Նոր Մարաղա ու Նոր Հայկաջուր գյուղեր՝ տեղում ուսումնասիրելու և արձանագրելու իրավիճակը:


«Տեղահանվող գյուղերի բնակիչների իրավունքների վերաբերյալ ավելի ուշ կհրապարակեմ իմ տեսաուղերձը, իսկ Տիգրանակերտի մասով մեծ ցավ եմ ապրում, որ պատմամշակութային ժառանգությունն ու պատմական ապացույցները որևէ նշանակություն չունեն քաղաքականության ու հայրենատիրության հարցերում: Մենք պարզապես պարտավոր ենք երկարատև պայքարով տեր կանգնելու մեր Հայրենիքին, արժեքներին ու իրավունքներին...», – նշել է Բեգլարյանը Facebook–յան իր էջում։

Նշենք, որ Տիգրանակերտը, որտեղ ընթանում էին հնագիտական պեղումներ, ինչպես նաև այդ շրջանի մի շարք գյուղեր, անցնում են Ադրբեջանի վերահսկողության տակ` նոյեմբերի 9–ին ստորագրված եռակողմ հայտարարության համաձայն։–0–