Պատերազմի այս փուլում տեղին չէ նշել հստակ դիրքեր, բնագծեր ու բնակավայրեր. Արծրուն Հովհաննիսյանը պարզաբանում է

ԵՐԵՎԱՆ, 12 հոկտեմբերի./Նովոստի–Արմենիա/. ՀՀ ՊՆ ներկայացուցիչ Արծրուն Հովհաննիսյանը պարզաբանել է, թե ինչու պատերազմի այս փուլում տեղին չէ նշել հստակ դիրքեր, բնագծեր ու բնակավայրեր։


«Ես մի քանի անգամ անդրադարձել եմ այն հարցին, որ հստակ դիրքեր, բնագծեր, նույնիսկ բնակավայրեր նշելը պատերազմի այս փուլում այնքան տեղին չէ: Պատերազմը սաստիկ է, հայկական բանակը վարում է ծանր մարտեր, իրեն մի քանի անգամ գերազանցող թուրք-ադրբեջանական ուժերի դեմ, որին լիովին աջակցում է թուրքական օդուժը, հետախուզական և այլ համակարգերը, մեծ թվով վարձկաններ, ահաբեկիչներ և մասնավոր զինվորական կազմակերպություններ: Այդ գերազանցող ուժերին հայկական բանակը դիմակայում է մեծ հաջողությամբ, այնպիսի հաջողությամբ, որ համաշխարհային փորձագետներն են անգամ նշում դրա մասին», – նշել է Հովհաննիսյանը Facebook–յան իր էջում:

Նրա խոսքով, ըստ մարտավարական և օպերատիվ անհրաժեշտության պաշտպանության բանակը կատարում է ինչպես նահանջ ու բնագծերի փոփոխություն, այնպես էլ հարձակում ու հակահարձակում:

«Վստահենք մեր բանակին, մենք անկասկած #Հաղթելուենք», – ընդգծել է Հովհաննիսյանը։–0–