Իմքայլական պատգամավորը պարզաբանել է, թե ինչու Հայաստանը չճանաչեց Արցախը ռազմական գործողությունների ժամանակ

ԵՐԵՎԱՆ, 19 նոյեմբերի./Նովոստի–Արմենիա/. Պատերազմի օրերին Հայաստանի կողմից Արցախի ճանաչման հարցն իսկապես երկակի և բարդ էր, հայտարարեց «Իմ քայլի» պատգամավոր Արման Եղոյանն այսօր ճեպազրույցի ժամանակ։


«Իմ կարծիքով, այս հարցում կարող էր լինել երկու մոտեցում` ճանաչել այն, ինչ կա, այսինքն այն փուլում, երբ մենք ունենք անհաջողություններ, ճանաչել այն, ինչ մնացել է։ Եվ երկրորդ մոտեցումը` սպասել ճեղքման և ճանաչել (Արցախը, խմբգր.) այն ժամանակ, երբ ուժեղ դիրքում լինեինք», – պարզաբանեց Եղոյանը։

Պատասխանելով լրագրողների այն հարցին, թե արդյոք հնարավորություն կա՞ր ճանաչել Արցախը պատերազմի առաջին օրերին` Եղոյանը նշեց, որ նման տարբերակ կար, սակայն ավելացրեց, որ ճանաչումը Հայաստանի կողմից այդ պահին կարող էր ունենալ «ինչպես դրական, այնպես էլ բացասական հետևանքներ»։

«Մենք, փաստորեն, ճանաչել ենք Արցախը, քանի որ մենք, օրինակ, միշտ Արցախին տրամադրում ենք պետական վարկ, եթե չենք ճանաչել, այդ դեպքում ինչպես ենք տաիս փոխառություն։ Չգիտեմ, թե Հայաստանի կողմից Արցախի դե–յուրե ճանաչումը որքանով կազդեր ռազմական գործողությունների կամ Արցախի հետագա ճանաչման գործընթացի վրա։ Կարող էր լինել ինչպես օգուտ, այնպես էլ ռիսկ», – հայտարարեց Եղոյանը։–0–