ԵՐԵՎԱՆ, 9 փետրվարի./Նովոսիտ–Արմենիա/. Արցախի հանրապետության նախկին նախագահ Բակո Սահակյանը Tert.am-ի հետ զրույցում անդրադարձել է Հայաստանի Հանրապետության և Արցախի Հանրապետության իշխանությունների միջև հարաբերություններին ու Արցախի հարցին այդ համատեքստում:
«Հայաստանի իշխանությունների հետ տարբեր ժամանակաշրջաններում քննարկել ենք Արցախի և Արցախի շուրջ տեղի ունեցող զարգացումների վերաբերյալ ամենատարբեր հարցեր։ 2016 թվականի ապրիլյան մարտական գործողություններից հետո մեծ ջանքեր ենք գործադրվել արտաքին քաղաքականության, անվտանգության ուղղություններում՝ Արցախի շահերն առաջ մղելու, բանակցային գործընթացում ճիշտ դիրքավորում ապահովելու, ռազմական գործողությունների վերսկսումը թույլ չտալու և հետպատերազմյան գործողությունների վերականգնողական շրջանից հետո, Արցախը զարգացման և անվտանգության ամրապնդման նոր փուլ մտցնելու համար», – նշել է Սահակյանը։
Նա նաև ընդգծել է, որ Հայաստանի նախկին իշխանությունները միակողմանի զիջումների (տարածքային) առաջարկ չեն արել, նման բան չի քննարկվել։
«Մեր համագործակցությունն ու երկխոսությունը Հայաստանի ղեկավարների հետ եղել է ազնիվ, շիտակ, կառուցողական և ցանկացած քննարկում եղել է փոխադարձ հարգանքի ու վստահության մթնոլորտում», – հայտարարել է Բակո Սահակյանը։
Նրա խոսքով, ինչպես Ապրիլյան մարտական գործողություններից հետո, այնպես էլ դրանից առաջ, Հայաստանի ղեկավարությունը մշտապես Արցախի իշխանությունների հետ կիսվել է բանակցային գործընթացի տարբեր հարցերի շուրջ, սակայն դրանք ոչ թե պարտադրման, այլ տեղեկացնելու, քննարկելու, Ստեփանակերտի տեսակետը լսելու նպատակ են ունեցել։–0–