ԵՐԵՎԱՆ, 10 հոկտեմբերի./Նովոստի–Արմենիա/. Հումանիտար հրադադար է հաստատվելու ղարաբաղյան հակամարտության գոտում Մոսկվայում կայացած Հայաստանի, Ռուսաստանի և Ադրբեջանի ԱԳ նախարարներ Զոհրաբ Մնացականյանի, Սերգեյ Լավրովի և Ջեյհուն Բայրամովի եռակողմ հանդիպման արդյունքում։
«Հայտարարվում է հրադադար 2020թ.–ի հոկտեմբերի 10–ին ժամը 12։00–ից հումանիտար նպատակներով` ռազմագերիներին և պահվող այլ անձանց ու զոհերի մարմինները փոխանակելու համար` Կարմիր Խաչի Միջազգային Կոմիտեի միջնորդությամբ ու չափորոշիչներին համապատասխան», – հայտարարել է Լավրովը։
Հոկտեմբերի 8–ին հրապարակվել է ՌԴ նախագահ Վլադիմիր Պուտինի հայտարարությունը, ով կոչ է արել կողմերին դադարեցնել կրակը Արցախում` գերիներին փոխանակելու և զոհերի մարմինները տեղափոխելու համար։ Պուտինը նաև հրավիրել է Հայաստանի և Ադրբեջանի ԱԳ նախարարներին Մոսկվա` հոկտեմբերի 9–ին խորհրդակցություններ անցկացնելու նպատակով։–0–
