ԵՐԵՎԱՆ, 5 նոյեմբերի./Նովոստի–Արմենիա/. Արցախում ահաբեկիչների ներգրավումն առավել քան մարտահրավեր է շատ ավելի լայն կոնտեքստում, քան բուն մեզ համար, հինգշաբթի ասաց ՀՀ ԱԳ նախարար Զոհրաբ Մնացականյանը 2021թ.–ի պետբյուջեի խորհրդարանական լսումների ժամանակ։
Նա նշեց, որ հայ ժողովուրդը պայքարում է փաստացի երեք թշնամու՝ Թուրքիայի, միջազգային ահաբեկիչ զինյալների և Ադրբեջանի դեմ։
«Ահաբեկիչ զինյալների հայտնվելը մեր տարածաշրջանում առավել քան մարտահրավեր է շատ ավելի լայն կոնտեքստում, քան բուն մեզ համար։ Դրա հետևանքները լրջագույն են: Ես չգիտեմ՝ ինչով էին մտածում Բաքվում, երբ ներքաշում էին այդ զինյալներին այս պատերազմի մեջ, քանի որ դա վտանգ է ամբողջ տարածաշրջանի համար և տարածաշրջանից դուրս: Սա նոր իրողություն է մեր տարածաշրջանում, որը առաջ է բերում գերակայությունների նոր շրջանակ»,-ասաց Մնացականյանը։
Загружается новость ... "Лево"
Պատասխանելով Ֆրանսիայի նման Հայաստանում ևս «Գորշ գայլեր» թուրքական ուլտրա–ազգայնամոլ շարժման գործունեությունն արգելելու հարցին` նախարարը նշեց, որ Հայաստանի համար այս տեսանկյունից ահաբեկչության դեմ պայքարը դարձել է ամենօրյա ուղղություններից մեկը։
Նախարարը նաև ասաց, որ կան միջազգային համագործակցության շրջանակներ, տարբեր միջազգային հարթակներ, որտեղ Հայաստանը ներգրավված է, սակայն սկսած սեպտեմբերի 27–ից ստեղծվել է նոր իրավիճակ, որն անմիջապես վերաբերում է տարածաշրջանին։
«Այս համատեքստում դուք նշեցիք մի խմբավորում, սակայն այսօր կարևորագույն գործառույթներից մեկը պետք է դառնա տարածաշրջանում այդ երևույթի դեմ պայքարի ավելի համալիր և նպատակային աշխատանքի կազմակերպումը», – ընդգծեց Մնացականյանը։
Հակառակ դեպքում, ինչպես նշեց նախարարը, սպառնալիքը կտարածվի տարածաշրջանի սահմաններից դուրս, այն սպառնում է բազմաթիվ հարևաններին և երկրներին։
«Այն, ինչ տեղի է ունենում Արցախում մարտի դաշտում, դա նաև աշխարհագրական մարտահրավեր է։ Մեր գործընկերների հետ շարունակելու ենք աշխատել, որ կարողանանք անհրաժեշտ արդյունքների հասնել տարածաշրջանում կայունությունը և խաղաղությունը պահպանելու և մեր ազգային այս լուրջ վտանգը նվազեցնելու և բացառելու առումով», – ասաց Մնացականյանը։
Նա վստահություն հայտնեց, որ Երևանն առաջիկայում կկարողանա ներկայացնել ավելի կոնկրետ քայլեր` նշելով, որ այս պահին շատ ակտիվ ընթանում է ինչպես երկկողմ, այնպես էլ միջազգային ուղղությունների ներգրավման աշխատանք`ահաբեկչության և զինված վարձկանների դեմ պայքարի համակարգման համար։
«Հիմա արդեն կառուցվել է երկխոսության համակարգ, որպեսզի մենք կարողանանք ավելի թիրախային կերպով հասնել նպատակի։ Կարծում եմ` առաջիկայում կկարողանամ ավելի կոնկրետ ասել», – ասաց Մնացականյանը։–0–
