Այս պահին ունենք մոտ 200 վիրավոր. Արծրուն Հովհաննիսյանը ներկայացնում է սահմանին տիրող իրավիճակը (ՎԻԴԵՈ)
11:28
28 Սեպտեմբերի 2020
ԵՐԵՎԱՆ, 28 սեպտեմբերի./Նովոստի–Արմենիա/. Ողջ գիշեր ընթացել են մարտեր Արցախի սահմանի ողջ երկայնքով, հատկապես հյուսիսի և հարավի ուղղությամբ։
Այս մասին հայտնեց ՊՆ ներկայացուցիչ Արծրուն Հովհաննիսյանը Հայկական միասնական տեղեկատվական կենտրոնում կազմակերպված ճեպազրույցի ընթացքում։
«Մեր ԶՈՒ–ին հաջողվել է դիրքային նոր բարելավումներ իրականացնել։ Հակառակորդը բնականաբար չի հանգստացել։ Որոշ տեղերում շարունակել է հակագրոհներ իրականացրել, որոնք հետ ենք մղել։ Վաղ առավոտյան կիրառելով հրետանային միջոցներ, այդ թվում` ծանր հրետանետեր, Ադրբեջանի ԶՈւ ստորաբաժանումները վերսկսել են հարձակողական գործողությունները։ Մեր Զինված ուժերն այս պահին վարում են համառ մարտեր, հերոսական մարտեր։ Այս պահի դրությամբ ունենք մոտ 200 վիրավոր, որոնց մի մասը տեղափոխվել է Երևան։ Բոլորը գտնվում են պատշաճ բժշկական վերահսկողության ներքո տարբեր զինվորական հոսպիտալներում, ինչպես նաև քաղաքացիական հիվանդանոցներում», – հայտնեց Հովհաննիսյանը։
Նա նաև նշեց, որ ադրբեջանական կողմը չի դիմել հայկական կողմը մնացած տասնյակ դիերը տարհանելու խնդրանքով։
Սեպտեմբերի 27–ին ժամը 07։10–ին Ադրբեջանի ԶՈւ–ն լայնածավալ գործողություններ է սկսել Արցախի շփման գծի ողջ երկայնքով։ Հայաստանի և Արցախի ՊՆ–ների հաղորդմամբ, հակառակորդը սկսել է օդային և հրթիռային հարձակումներ, սակայն հետ է ամղվել մի քանի ուղղություններով։ Ադրբեջանական կողմը կրել է կենդանի ուժի կորուստներ (մոտ 200 մարդ), կորցրել է նաև տեխնիկա։ Մասնավորապես, ոչնչացվել է 33 տանկ և ԲՄՊ, 4 ուղղաթիռ, 27 ԱԹՍ, 2 ինժեներական զրահամեքենա։
Արցախի և Հայաստանի ՊՆ–ների հաղորդմամբ, հայկական կողմից զոհվել է 31 զինծառայող։
Նշենք, որ Ադրբեջանի ԶՈւ–ն գնդակոծում է նաև խաղաղ բնակավայրերը, այդ թվում` Արցախի մայրաքաղաք Ստեփանակերտը։
Արցախում և Հայաստանում հայտարարվել է ռազմական դրություն և համընդհանուր զորահավաք։–0–
Սամվել Շահրամանյանը հայտարարել է, որ Արցախի Հանրապետության իրավական դաշտում գոյություն չունի փաստաթուղթ, որով նախատեսվում է լուծարել պետական ինստիտուտները
Արցախի պետական ինստիտուտները Հայաստանում գործում են՝ ի՞նչ անեն, ի՞նչ ֆունկցիա պետք է իրականացնեն, Հայաստանի Հանրապետություն կա, որի ինստիտուտները գործում են, հայտարարել է ՀՀ նախագահը․ ՎԻԴԵՈ
