ԵՐԵՎԱՆ, 24 փետրվարի./Նովոստի–Արմեիա/. Հայաստանի իշխանությունները, ըստ էության, համաձայնություն են տվել, որ Արցախը լինի Ադրբեջանի կազմում, ինչի մասին վկայում են հայ և ադրբեջանցի պաշտոնյաների, ինչպես նաև միջնորդների հայտարարությունները։ Նման կարծիք է հայտնել ՀՀ ԱԳ նախկին նախարար Վարդան Օսկանյանը` ուրբաթ ելույթ ունենալով «Արցախի Հանրապետության միջազգային ճանաչման հրամայականը» խորագրով գիտագործնական համաժողովի ժամանակ։
«Այս մասին ասվում է տարբեր փաստաթղթերի նախագծերում։ Այս մոտեցումը վերջնականորեն կամրագրվի խաղաղության պայմանագրի ստորագրմամբ», – ասել է Օսկանյանը։
«Այն, ինչ կատարվում է այսօր դիվանագիտական հարթությունում, Հայաստանը՝ համագործակցությամբ Ադրբեջանի և միջնորդների, փորձում է Արցախը Ադրբեջանի կազմում թողնելուն տալ մի այնպիսի փաթեթավորում, որը կքողարկի այս հանգամանքը: Այսօր այդ դիվանագիտական աշխատանքն է գնում։ Եթե դա իրենց մոտ ստացվի, դա կներկայացնեն որպես ձեռքբերում։ Այստեղ ՀՀ իշխանությանը շատ դժվար կլինի լղոզել, փաթեթավորել կամ քողարկել հենց Արցախը Ադրբեջանի կազմում թողնելու հանգամանքը: Պարզ է, որ Ադրբեջանը կպարտադրի, որ սևը սպիտակի վրա այդ հարցը հստակ ձևակերպվի խաղաղության պայմանագրում։ Քողարկումը վերաբերելու է նրան, որ այնտեղ դրույթ է լինելու, որ իբր, հակառակ նրան, որ Հայաստանը ընդունում է, որ Արցախը պետք է Ադրբեջանի կազմում լինի, բայց երկխոսություն է լինելու Արցախի հայության և Բաքվի միջև, որը տպավորություն է ստեղծելու, թե Արցախի ժողովուրդը հնարավորություն ունի ինքնորոշվելու: Իբր այդ պատուհանը բաց է թողնվում: Եթե այդ պայմանագիրը ստորագրվի այն բովանդակությամբ, որը ես նկարագրեցի, այն պահին, երբ այդ փաստաթուղթը ստորագրվի, Արցախը կվերածվի Ջավախքի։ Ինչպես կա ջավախահայություն, այնպես էլ կլինի Արցախում: Բայց Ջավախքի ու Արցախի տարբերությունը այն է, որ մի քանի տարի հետո Արցախը վերածվելու է Ջավախքից Նախիջևանի», – ասել է նա։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
