Արցախում լարված է. Ադրբեջանի ԶՈւ–ն կրակում է հրաձգային զինատեսակներից և ականանետերից

ԵՐԵՎԱՆ, 10 մարտի./Նովոստի–Արմենիա/. Մարտի 9–ին օրվա ընթացքում, այնուհետև ողջ գիշեր Ադրբեջանի զինված ուժերը, տարբեր տրամաչափի հրաձգային զինատեսակների, ինչպես նաև ականանետերի կիրառմամբ, պարբերաբար խախտել է հրադադարը։

«Ինչպես հաղորդում է Արցախի ՊԲ–ն, մասնավորապես՝ մարտի 9-ին, ժամը 14։00–14։30 ի սահմաններում ԱՀ Մարտունու շրջանի Խնուշինակ գյուղի հարակից տարածքի ուղղությամբ արձակվել է 60 մմ տրամաչափի ականանետի 2 հատ ական, իսկ ժամը 15։50–ից մինչև մարտի 10–ի ժամը 05։40–ը ընկած ժամանակահատվածում հակառակորդը 15 անգամ 60 մմ. տրամաչափի ականանետ է կիրառել արևելյան ուղղությամբ՝ Խրամորթ գյուղի հարակից տարածքի վրա արձակելով ընդհանուր առմամբ 23 հատ ական», – նշվում է գերատեսչության հաղորդագրության մեջ։

Հայկական կողմից տուժածներ չկան։ Հրադադարի կոպիտ խախտումների վերաբերյալ տեղեկացվել է Արցախում խաղաղապահ առաքելություն իրականացնող ՌԴ զորակազմը։–0–