ԵՐԵՎԱՆ, 17 հունիսի. /Նովոստի-Արմենիա/. Շաբաթ առավոտյան ադրբեջանական կողմը հյուսիսային ուղղությամբ դիմել է հերթական սադրանքի, հայտնում է Արցախի պաշտպանության նախարարության մամուլի ծառայությունը:
Հակառակորդի սադրանքի հետևանքով ժամը 09.40-ի սահմաններում մահացու հրազենային վիրավորում է ստացել ՊԲ զինծառայող, 20-ամյա Նարեկ Տիգրանի Գասպարյանը:
Նախօրեին ադրբեջանական զինուժը հակամարտ զորքերի շփման գծում կրկին նախահարձակ գործողություն էր կատարել, որի հետևանքով
հայկական կողմն ունեցել է կորուստներ:
«Արցախի Հանրապետության պաշտպանության նախարարությունը կիսելով կորստյան ծանր վիշտը, իր զորակցությունն է հայտնում զոհված զինծառայողի ընտանիքի անդամներին, հարազատներին ու ծառայակիցներին և հավաստիացնում, որ միջազգային համապատասխան կազմակերպությունների անհասցե հայտարարություններից ոգևորված հակառակորդի դարանակալ գործողությունների պատասխանը լինելու է թիրախային և անհամարժեք»,- նշվում է հաղորդման մեջ: -0-