ԵՐԵՎԱՆ, 9 նոյեմբերի./Նովոստի–Արմենիա/. BILD գերմանական հեղինակավոր հրատարակության գլխավոր խմբագիր Փոլ Ռոնժայմերը BBC–ի միջազգային թղթակից Օրլա Գուերինին զուգահեռ մեղադրել է Ադրբեջանի նախագահ Իլհամ Ալիևին ստի մեջ։
Այսօր Գուերինն Ալիևի հետ հարցազրույցից հետո հետևյալ բովանդակության Twitt է գրել։
«Իլհամ Ալիևը BBC–ին հայտարարել է, որ Լեռնային Ղարաբաղի շուրջ փոխզիջման ժամանակը լրանում է, նա «անհիմն է» համարել հայկական քաղաքացիական բնակչության էթնիկ զտումների շուրջ մտավախությունները և հայտարարել է, որ Ստեփանակերտի քաղաքացիական շրջանների հրթիռակոծումը, որոնց ականատեսն է եղել BBC–ն, «կեղծ լուրեր են»», – նշել է Գուերինը։
Գուերինի գրառմամբ
կիսվել է Ռոնժայմերն` իր կողմից ավելացնելով.«Ոչ միայն BBC–ին գիտի, որ նախագահը հերթական անգամ ստում է։ Մենք այնտեղ եղել ենք երկու շաբաթ, գրեթե ամեն օր և ամեն գիշեր տեսել ենք բնակավայրերի հրթիռակոծումները։ Ադրբեջանի նախագահ, կան բազմաթիվ թղթակիցներ, որոնք կարող են ապացուցել. «Դուք ստում եք»»։
Երկուշաբթի հրապարակված BBC-ի հարցազրույցում Ալիևը կեղծ է անվանել միջազգային լրատվամիջոցների հաղորդած տեղեկություններն այն մասին, որ Ադրբեջանի ԶՈւ–ն կանխամտածված թիրախավորում է Արցախի խաղաղ բնակչությանը։ Ալիևը նաև ասել է, որ լրատվամիջոցները դրսևորում են կանխակալ վերաբերմունք` նշելով, որ «ադրբեջանական ուժերը չեն հարձակվում ոչ ռազմական թիրախների ուղղությամբ»։
Այս կապակցությամբ ՀՀ ԱԳՆ–ն
հայտարարել է, որ Ալիևը, հասկանալով, որ վաղ թե ուշ կրելու է իր կողմից իրականացված պատերազմական հանցագործությունների պատասխանատվությունը, հուսահատ փորձ է անում ժխտել իրականությունը՝ այն անվանելով «կեղծ լուրեր»:
«Իլհամ Ալիևի մարդատյաց այս հայտարարությունը, որն արվում է իր հրամանով գործող զինված ուժերի կողմից Արցախի քաղաքացիական ենթակառուցվածքների շարունակական թիրախավորման ֆոնին, ևս մեկ անգամ փաստում է, որ Արցախի ժողովուրդը որևէ հանգամանքում չի կարող լինել Ադրբեջանի իրավասության ներքո», – հայտարարել է ՀՀ ԱԳՆ մամուլի քարտուղարը։–0–
