ԵՐԵՎԱՆ, 14 դեկտեմբերի. /Նովոստի–Արմենիա/. Բելառուսի նախագահ Ալեքսանդր Լուկաշենկոն ռուս լրագրողների հետ հանդիպման ժամանակ անդրադարձել է ղարաբաղյան հակամարտության կարգավորմանը, հաղորդում է Բելառուսի նախագահի պաշտոնական կայքը։
Լուկաշենկոն, մասնավորապես, պատմել է ղարաբաղյան հակամարտության կարգավորման հարցում Ռուսաստանի և Բելառուսի մասնակցության առաջարկների մասին, որոնք արվել են ավելի վաղ։
Լուկաշենկոյի խոսքով, այս հարցը քննարկվել է դեռ Երևանում ՀԱՊԿ գագաթնաժողովներից մեկի ժամանակ, երբ ՀՀ նախագահը Սերժ Սարգսյանն էր։
Բելառուսի նախագահը, մասնավորապես, նշել է, որ կոչ է արել Հայաստանի և Ադրբեջանի առաջնորդներին միասին լուծել այդ խնդիրը` գնալով փոխզիջումային որոշումների։
«Միաժամանակ Բելառուսն ու Ռուսաստանը զբաղեցրել են կոնսոլիդացված դիրքորոշում` խոստանալով անհրաժեշտության դեպքում զորք մտցնել։ Հետո բացահայտ ասացի. «Ինչպես նրանք ասում են` 7 շրջան եք օկուպացրել։ Եվ մենք Պուտինի հետ զբաղեցրեցինք կոնսոլիդացված դիրքորոշում (դա Երևանում էր` ՀԱՊԿ գագաթնաժողովի շրջանակում)։ Սերժ, տուր այդ 5 շրջանները։ Դրանք չվերադարձնելու ի՞նչ պատճառ կա, չէ՞ որ դրանք դատարկ են։ Իսկ նա ասում է. «Եթե ես վերադարձնեմ, նրանք այնտեղ ճանապարհը կկտրեն, կօկուպացնեն Ղարաբաղը և այլն»։ Եվ ես ու Պուտինը հստակ խոստացանք, որ զորք կմտցնենք, և դա թույլ չենք տա (ադրբեջանցիների ներկայությամբ ենք ասել)։ Նա ասաց. «Ոչ, դրան չենք գնա, մենք դա չենք ուզում»», – նշել է Բելառուսի առաջնորդը։
Ալեքսանդր Լուկաշենկոն նաև ասել է, որ դա իր համար զարմանալի էր։
«Ինչու՞ չեն ուզում, 5 շրջան դատարկ է, դա առաջին քայլն է։ Այդ ժամանակ և′ Ադրբեջանը, և′ Հայաստանը կլինեին և′ ՀԱՊԿ–ում, և′ ԵվրԱզԷՍ–ում։ Դա այն պայմանն էր, որի դեպքում Ադրբեջանը կարող էր անդամակցել այդ կազմակերպություններին։ Ինչու՞ հրաժարվեցիք։ Լավ, մի կողմ թողնենք Բելառուսը, սակայն Ռուսաստանը հանդես էր գալիս որպես երաշխավոր, որ երբեք այնտեղ պատերազմ չի լինի, եթե ազատվեն այդ շրջանները, որոնք դուք ընդունում եք, որ ադրբեջանական են։ Խոսքը Ղարաբաղի մասին չէ», – ավելացրել է Բելառուսի նախագահը։
Լուկաշենկոն նաև կարևորել է ղարաբաղյան հակամարտության խաղաղ կարգավորումը, այդ թվում` որպես կարևոր գործոն օտարերկրյա ներդրումներ ներգրավելու համար։–0–