Տեղի է ունեցել վերջին երեք ամսվա ընթացքում ամենաուժեղ մագնիսական փոթորիկը. ինչպես պաշտպանել առողջությունը
ԵՐԵՎԱՆ, 3 հոկտեմբեր․/Նովոստի-Արմենիա/. Հոկտեմբերի սկզբին Երկիրը ենթարկվեց հզոր արեգակնային բռնկման։ Գեոմագնիսական ակտիվության ինդեքսը բարձրացավ մինչև 7.33, որը հինգբալանոց սանդղակով համարժեք է G3+-ին։ Սա նշանակում է, որ մոլորակի վրա մոլեգնում է հզոր մագնիսական փոթորիկ, որը կարող է խաթարել էներգետիկ համակարգերը, ազդել կապի, արբանյակային նավիգացիայի և նույնիսկ մարդկանց առողջության վրա։ Այս մասին գրում է ria.ru-ն։
Ինչո՞ւ են մագնիսական փոթորիկները այդքան վտանգավոր։
Ինչպես «Газета Россия»-ին տված հարցազրույցում նշել է ՌԴ գիտությունների ակադեմիայի տիեզերական հետազոտությունների ինստիտուտի Արեգակնային աստղագիտության լաբորատորիայի ղեկավար Սերգեյ Բոգաչովը, տիեզերքում իրավիճակը «բարդ է»։ Վերջին անգամ նմանատիպ բան գրանցվել է ամռանը, երբ Երկիրն ուղիղ հարված ստացավ արեգակից։ Այսօր մարդկությունը կրկին զգում է տիեզերքի «շունչը»։
«Արեգակնային բռնկումները և դրանց հաջորդող մագնիսական փոթորիկները պարզապես բևեռափայլերի գեղեցիկ դրսևորումներ չեն։ Դրանք էներգետիկ «հարձակումներ» են մոլորակի մթնոլորտի բնական պաշտպանիչ շերտի վրա, և Երկրի մագնիսական դաշտում ապրող մարդիկ զգում են դրանց հետևանքները։ Երբ մագնիսական դաշտը կտրուկ փոխվում է, շատերը սկսում են տառապել գլխացավերից, արյան ճնշման կտրուկ տատանումներից և թուլությունից»,-ասել է նա։
Կայքը նշում է, որ մարդիկ հաճախ դառնում են դյուրագրգիռ և գանգատվում անքնությունից: Շատերի մոտ քրոնիկ հիվանդությունների սրացումներ են նկատվում: Բժիշկները պնդում են, որ բնակչության մոտավորապես 70%-ը կարող է կանխատեսել եղանակի փոփոխությունները և մագնիսական փոթորիկները, նախքան դրանք կհասնեն իրենց պիկին։
«Այս օրերը հատկապես դժվար են տարեցների, սրտանոթային խնդիրներ, շնչառական հիվանդություններ և նյարդային խանգարումներ ունեցող հիվանդների համար»,- նշում է աղբյուրը՝ հղում անելով Lenta-ին։
Ո՞վ է ռիսկի խմբում։
Մագնիսական փոթորիկների հետևանքներն առավել ուժեղ են զգում հիպերտոնիայով և աթերոսկլերոզով տառապող մարդիկ։ Հատկապես զգայուն են շնչառական հիվանդություններ և ասթմա ունեցողները։ Ավելի բարձր ռիսկի խմբում են նրանք, ովքեր անցյալում ունեցել են գլխուղեղի տրավմատիկ վնասվածք կամ ինսուլտ։
Խորհուրդներ բժիշկներից
«Комсомольская правда»-ին տված հարցազրույցում նյարդաբան Վիկտոր Կոսը նշել է, որ կան միջոցներ այդպիսի օրերին վատ ինքնազգացողությունը մեղմելու համար։
«Բացասական ազդեցությունը նվազեցնելու համար բժիշկները խորհուրդ են տալիս հատուկ ուշադրություն դարձնել քնի ռեժիմին։ Եթե մարդը բավարար քուն չի ստանում, ապա նյարդային համակարգը դառնում է չափազանց խոցելի։ Օրվա ընթացքում նույնիսկ 20-30 րոպեանոց կարճատև քունը կարող է օգնել թեթևացնել գլխացավը և նվազեցնել դյուրագրգռությունը։
Վերջապես, հատկապես կարևոր է այս օրերին հրաժարվել ալկոհոլից և ծխախոտից: Այս սովորություններն արդեն իսկ ծանրաբեռնում են արյան անոթները, և երբ զուգակցվում են մագնիսական փոթորկի հետ, ազդեցությունն ավելի կործանարար է դառնում»,-ասել է նա։
Միֆ և իրականություն
Ինչպես նշում է «Аргументы и факты»-ը, մագնիսական փոթորիկների հետ կապված կան բազմաթիվ թյուր պատկերացումներ:
«Շատերը կարծում են, որ առողջ մարդիկ դրանք չեն զգում: Իրականում, նույնիսկ լիարժեք առողջ մարդիկ կարող են հոգնածություն և թեթև գլխացավեր զգալ, բայց ախտանիշները պակաս արտահայտված են: Մյուսները պնդում են, որ սա պարզապես ինքնախաբեություն է»,-ասվում է հրատարակության տեքստում։
Նաև նշվում է, որ ուսումնասիրությունները փաստել են արյան ճնշման և զարկերակի օբյեկտիվ տատանումներ մագնիսական փոթորիկների ժամանակ, ինչը ենթադրում է, որ օրգանիզմն իսկապես արձագանքում է: Ոմանք կարծում են, որ սուրճը լավագույն միջոցն է այդպիսի օրերին, սակայն իրականում այն կարող է անոթային սպազմեր առաջացնել և ավելի սրել խնդիրը:
