Ինչու պատրաստի թխվածքը հեշտությամբ դուրս չի գալիս տապակից. խմորեղեն պատրաստելու մի քանի գաղտնիք

ԵՐԵՎԱՆ, 6 դեկտեմբեր․/Նովոստի-Արմենիա/. Ինչ պետք է անել թխվածքի այրվելը կանխելու համար, եթե ջեռոցը ջերմաչափ չունի, ինչպես կարելի է կողմնորոշվել. ներկայացնում ենք որակյալ թխվածք պատրաստելու  մի քանի գաղտնիք, որոնք գերազանց արդյունք են ապահովում։

-Խմորեղեն թխելիս ջեռոցը պետք է տաքացնել 10 րոպե առաջ՝ գազի և 25 րոպե առաջ՝ էլեկտրականի դեպքում։

-Ջեռոցի ջերմաստիճանը կախված է խմորեղենի տեսակից, չափսերից և ձևից։ Տարբերում ենք 3 տիպի ջերմաստիճան՝ մեղմ 130-180 C, միջին 180-220 C և բարձր 220-270 C։

-Եթե ջեռոցը ջերմաչափ չունի, կարելի է կողմնորոշվել հետևյալ կերպ. Եթե մի պտղունց ալյուրը, որը դրել եք ջեռոցի մեջ, սկզբում դեղնում է, իսկ 30 րոպե անց մգանում, նշանակում է՝ ջեռոցի ջերմաստիճանը կազմում է 220-240C, եթե ալյուրն անմիջապես ածխանում է, ուրեմն ջերմաստիճանը 270-280 է, իսկ եթե ալյուրը դեղնում է աստիճանաբար, ապա ջերմաստիճանը 180-200C է։

-Մանր, փոքրիկ խմորեղենը պետք է թխել բարձր ջերմաստիճանում, իսկ մեծ և հաստ խմորեղենը՝ ցածր ջերմաստիճանում և ավելի երկար, որպեսզի խմորը լավ եփվի։

-Եթե խմորը բավարար չափով հասունացել է, ապա մատով արած փոսիկը անհետանում է դանդաղ։

-Խմորի վրա ձու պետք է քսել պատրաստ լինելուց 5-10 րոպե առաջ։

-Որպեսզի խմորեղենը փափուկ մնա, տաք վիճակում այն պետք է ծածկել սրբիչով։

-Տորթը գեղեցիկ կտրելու համար դանակը պետք է տաքացնել կրակի վրա կամ մտցնել տաք ջրի մեջ։

-Թխվածքը համեղ կստացվի, եթե սկզբում ձվի դեղնուցը հարվի շաքարավազով, իսկ այնուհետև առանձին հարված սպիտակուցն ավելացվի խմորին։

-Եթե պատրաստի թխվածքը հեշտությամբ դուրս չի գալիս տապակից, ապա տապակը 2-3 րոպե դրեք խոնավ կտորի վրա, և թխվածքը հեշտությամբ դուրս կգա։

-Թխվածքի այրվելը կանխելու համար հարկավոր է ջեռոցի հատակին մի քիչ աղ ցանել։

-Թխվածքը պետք է աստիճանաբար սառեցնել. Ջերմաստիճանի կտրուկ փոփոխության դեպքում այն կարող է նստել կամ մեջտեղում փոս առաջանալ։

-Բիսկվիտային տորթը երկար կպահպանվի թարմ վիճակում, եթե այն պահեք կես խնձորի հետ։