Ինչ ուտել նախաճաշին, եթե ցանկանում եք նիհարել

ԵՐԵՎԱՆ, 27 մարտի./Նովոստի-Արմենիա/.  Թերևս միֆ է այն կարծիքը, թե նախաճաշն անհրաժեշտ է նիհարելու համար։ Յուրաքանչյուր մարդու կենսառիթմերն անհատական են, և կան մարդիկ, որոնք պարզապես չեն կարող արթնանալուց անմիջապես հետո ուտել և սահմանափակվում են միայն մեկ բաժակ սուրճով: Եթե դուք, ամեն դեպքում, սովոր եք նախաճաշել, ճիշտ ընտրված մթերքը էներգիա կհաղորդի ողջ օրվա ընթացքում, կկանխի չափից շատ ուտելու ռիսկն ու նույնիսկ կօգնի ազատվել ավելորդ կիլոգրամներից, գրում է bazaar.ru–ն։

Այսօր կխոսենք այն մասին, թե ինչ է պետք ուտել նախաճաշին նիհարելու համար:

Ավելի լավ է հրաժարվել նախաճաշին մեկ բաժակ սուրճ խմելու և կրուասան կամ մի քանի միրգ ուտելու սովորությունից։ Այս մթերքները գրեթե ամբողջությամբ բաղկացած են արագ ածխաջրերից, որոնք առաջացնում են արյան մեջ շաքարի կտրուկ բարձրացում: Բարձրացմանը հետևում է կտրուկ նվազում, և մեկ ժամվա ընթացքում կրկին քաղցի զգացում է առաջանում: Բացի այդ, գիտականորեն ապացուցված է, որ արյան մեջ գլյուկոզայի մակարդակի փոփոխությունները խիստ ազդում են տրամադրության վրա. ավելանում է անհանգստությունն ու հոգնածությունը, իսկ դա հաստատ հարկավոր չէ առավոտյան:

Առավոտյան սննդակարգում պետք է ներառված լինեն սպիտակուցներով և դանդաղ ածխաջրերով հարուստ մթերքներ: Օրգանիզմից շատ ժամանակ և էներգիա կպահանջվի դրանք յուրացնելու համար, ինչը նշանակում է, որ կարող եք հանգիստ դիմանալ մինչև ճաշ՝ չունենալով քաղցի զգացողություն:

Չպետք է մոռանալ նաև բջջանյութի և առողջ ճարպերի մասին: Բջջանյութով հարուստ բանջարեղենը խթանում է մարսողությունը, ինչը շատ կարևոր է, քանի որ գիշերը մեր օրգանիզմում բոլոր գործընթացները զգալիորեն դանդաղում են: Առողջ (չհագեցած) ճարպերով հարուստ մթերքները կօգնեն երկար ժամանակ մոռանալ քաղցի մասին և օրգանիզմը կապահովեն անհրաժեշտ ճարպաթթուներով։

Հաշվի առնելով այս կանոնները` պետք է ընտրել նախաճաշի այն տարբերակները, որոնք ձեզ դուր են գալիս: Այն կարող է լինել ֆիթնես բլոգերների սիրելի ավոկադոյի տոստը, խաշած ձուն կամ օմլետը, վարսակափաթիլներով և հատապտուղներով շիլան և այլն