Ֆիթնես-մարզիչը ներկայացնում է մթերքներ և մեկ օրվա ճաշացանկ՝ 50 տարեկանից հետո առողջ նիհարելու համար
ԵՐԵՎԱՆ, 12 հունիսի․/Նովոստի–Արմենիա/․Տարիքի հետ շատերը սկսում են նկատել, որ նախկինում կենսուրախություն ու ուժ հաղորդող մթերքներն այլևս նույն արդյունքը չեն տալիս, իսկ դիետաներն էլ չեն արդարացնում սպասումները։ Ֆիթնես-մարզիչ Ելիզավետա Պրոկուդինան բացահայտել է 50 տարեկանից հետո նոր սննդակարգ սահմանելու գաղտնիքները։ Գրում է aif.by-ը։
Հիմնական մթերքներ
«Տարիքի հետ մենք սկսում ենք հատկապես զգայուն արձագանքել նրան, թե ինչպես և ինչ ենք ուտում։ Թվում է, թե ամեն ինչ նույնն է՝ ծանոթ մթերքներ, սովորական սննդակարգ։ Բայց ինչ-որ պահից սկսում ես զգալ՝ ուժերն ընկնում են, տրամադրությունն անկայուն է, և պարզապես ուզում ես քեզ ավելի լավ ու հավասարակշռված զգալ։ Իսկ իրականում գաղտնիքը հաճախ թաքնված է սննդակարգում։ 50 տարեկանից հետո այն էական ազդեցություն է ունենում ոչ միայն մեր արտաքին տեսքի, շարժունակության, այլև մտքի հստակության վրա», - նշում է ֆիթնես-մարզիչ Ելիզավետա Պրոկուդինան։
«Խիստ դիետաներ պահել և սիրելի ուտեստներից հրաժարվել պետք չէ։ Ամենակարևորը՝ մի փոքր ավելի շատ հոգ տանել ձեր մասին ու ուշադրություն դարձնել ձեր սննդակարգին»,- նշում է ֆիթնես-մարզիչը։
Նոր սննդակարգ Ելիզավետան նշել է այն մթերքները, որոնք հատկապես օգտակար են հասուն տարիքում։
«Դրանք օգտակար են ոչ թե պարզապես այն պատճառով, որ այդպես խորհուրդ են տալիս մարզիչներն ու սննդաբանները, այլ որովհետև իրականում նպաստում են ձեր՝ էներգիայով լի ու կենսուրախ ինքնազգացողությանը։ Յուղոտ ձուկ (օրինակ՝ սաղմոն, սկումբրիա և այլն)։ Սա օմեգա-3 ճարպաթթուների աղբյուր է, որոնք աջակցում են սրտի, անոթների աշխատանքին և հիշողությանը։ Կանաչ բանջարեղեն (հատկապես բրոկկոլի և սպանախ)։ Վիտամինների, մանրաթելերի իսկական գանձարան է և հիանալի օգնական՝ մարսողության համար։ Հատապտուղներ (հատկապես հապալաս, մալինա, մոշ)։ Դրանք ոչ միայն համեղ են, այլ նաև իսկական հակաօքսիդանտ սուպերհերոսներ են՝ պաշտպանում են բջիջները ծերացումից և պահում ուղեղը ակտիվ վիճակում։ Թթվաշերտ կաթնամթերք։ Յոգուրտը կամ կաթնաշոռը հարուստ են պրոբիոտիկներով, որոնք խնամում են աղիքային միկրոֆլորան։ Իսկ այն ուղղակիորեն ազդում է իմունային համակարգի և տրամադրության վրա։ Ձու, լոբազգիներ, ընկույզներ և ամբողջահատիկ շիլաներ։ Սպիտակուցի և էներգիայի կայուն աղբյուր են։ Հնդկացորենը, քինոան, լոբին, նուշը համեղ են, հագեցնող, սննդարար և օգտակար։ Ելիզավետա Պրոկուդինան խորհուրդ է տալիս կատարել մի քանի պարզ քայլ։ Նախ՝ ազատվել տանն առկա «գայթակղիչ» մթերքներից՝ չիպսերից, քաղցր գազավորված ըմպելիքներից, երշիկներից։
«Պարզապես մի՛ գնեք դրանք», -պնդում է նա։ Երկրորդ, նա առաջարկում է տապակելու փոխարեն նախընտրել եփելը կամ շոգեխաշելը, իսկ արևածաղկի ձեթի փոխարեն օգտագործել ձիթապտղի կամ գիհի յուղ (մաքրած հալեցրած յուղի տեսակ -խմբ.)։ «Դա կլինի և՛ առողջարար, և՛ համեղ»,- նշում է մասնագետը։
Ֆիթնես-մարզիչը խորհուրդ է տալիս սահմանել հստակ սննդակարգ. 3 հիմնական ճաշ և 1-2 թեթև խորտիկ։
«Այսպես դուք չեք թերսնվի և չեք էլ չարաշահի սնունդը, -նշում է Ելիզավետան և ավելացնում. «Ամենակարևորը՝ մի՛ հանդիմանեք ձեզ որևէ կարկանդակ ուտելու համար։ Սնունդը նաև ուրախություն է։ Իսկ մեղքի զգացումը հաստատ օգտակար չէ»։
Իսկ եթե սնվում ենք բոլոր նշված մթերքներով, պետք չէ՞ արդյոք հավելյալ վիտամիններ և սննդային հավելումներ ընդունել հարցին ֆիթնես-մարզիչը շեշտում է․
«Տարիքային փոփոխությունների հետ հաճախ օրգանիզմը լրացուցիչ աջակցություն է պահանջում։ Առանձնապես կարևորվում են վիտամին D-ն, B12-ը, մագնեզիումը և օմեգա-3 ճարպաթթուները։ Բայց այս հարցում պետք չէ գուշակել, թե ինչ պետք է անել։ Ավելի լավ է հանձնել անալիզներ և խորհրդակցել բժշկի կամ սննդաբանի հետ։ Նրանք կօգնեն հասկանալ, թե կոնկրետ ի՞նչն է պակաս ձեր օրգանիզմին», - կարծում է Ելիզավետան։
Նրա կարծիքով՝ ճիշտ սնվելը խիստ սահմանափակումների մասին չէ, այլ՝ ինքնախնամքի։
«Ձեր օրգանիզմն արդեն հսկայական աշխատանք է կատարել, հիմա կարելի է նրան խնամել համեղ, պարզ և սննդարար ուտեստներով։ Մի՛ փնտրեք իդեալը, այլ փնտրեք հավասարակշռություն։ Թող յուրաքանչյուր կերակուր լինի ոչ միայն օգտակար, այլև հաճելի։ Դուք պարզապես առողջություն չեք պահպանում ,այլ ներդրում եք անում ձեր ապագայում։ Սիրով ինքներդ դեպի ձեզ՝ գդալ առ գդալ», - ամփոփում է մասնագետը։
Ելիզավետա Պրոկուդինան ներկայացրել է նաև մեկ օրվա ճաշացանկի օրինակ
Նախաճաշ․ բանջարեղենով օմլետ, ամբողջահատիկ հաց, կանաչ թեյ։
Խորտիկ (նախաճաշից հետո)․ յոգուրտ՝ հատապտուղներով և ընկույզներով։
Ճաշ․ եփած ձուկ հնդկացորենով, թարմ բանջարեղենից աղցան՝ ձիթապտղի յուղով։
Երեկոյան խորտիկ․ եփած խնձոր կաթնաշոռով կամ մի բուռ չորամրգեր։
Ընթրիք․ շոգեխաշած բանջարեղեն՝ լոբով կամ հնդկահավի մսով, մեկ բաժակ կեֆիր։
