Բնակա՞ն, թե՞ արհեստական․ մեղրը ստուգելու պարզ միջոցներ
ԵՐԵՎԱՆ, 12 նոյեմբերի․/Նովոստի–Արմենիա/․ Համաձայն ընդհանուր ընդունված ստանդարտների՝ բնական մեղրը չպետք է պարունակի նյութեր, որոնք բնորոշ չեն իր բնական բաղադրությանը։
Արհեստական է համարվում մեղրը, որը պարունակում է սննդի խտացուցիչներ, գելացնող նյութեր և սննդի արդյունաբերության մեջ օգտագործվող այլ բաղադրիչներ, գրում է mixnews–ը։
Պատմում ենք, թե ինչպես կարելի է ստուգել մեղրում հավելումների առկայությունը։
Հայտնի է, որ բնական մեղրը ջրի մեջ լուծվում է առանց մնացորդի, իսկ լուծույթը մնում է ամբողջովին թափանցիկ։ Եթե մեղրը լուծելիս լուծույթը պղտորվում է, ապա մեղրն արհեստական է, դրա մեջ ավելացվել է նյութ, որն ամբողջությամբ չի լուծվում ջրի մեջ։ Սովորաբար դրանք տարատեսակ խտացուցիչներ են, գելացնող նյութեր, կավիճ, ալյուր, օսլա և այլն: Եթե պղտոր լուծույթը զտվում է թղթե ֆիլտրով, ապա դրա վրա կհայտնվի այդ նյութի չլուծվող մնացորդը:
Կեղծիքի հայտնաբերման ևս մեկ պարզ, ապացուցված մեթոդ կա՝ մի քանի կաթիլ յոդ կաթեցնել ջրում գտնվող մեղրի լուծույթի մեջ: Այս դեպքում բնական մեղրի լուծույթը պետք է դեղին դառնա։ Լուծույթի ցանկացած այլ գույնի դեպքում պարզ է դառնում, որ մեղրը բնական չէ։ Եթե մեղրը պարունակում է օսլա կամ ալյուր, ապա ջուրը կապույտ կդառնա։
