Արջի թարմ հետքեր են հայտնաբերվել «Արփի լիճ» ազգային պարկում (ՖՈՏՈ)
20.05.2025,
10:33
Սա միաժամանակ զգուշացման և ուրախալի փաստի ազդանշան է․ ՖՈՏՈ
ԵՐԵՎԱՆ, 20 մայիսի․/Նովոստի–Արմենիա/․ «Արփի լիճ» ազգային պարկի տարածքում հայտնաբերվել են արջի թարմ հետքեր, հայտնում է Շրջակա միջավայրի նախարարությունը։
«Սա միաժամանակ զգուշացման և ուրախալի փաստի ազդանշան է։ Զգուշացման, քանի որ վայրի կենդանու առկայությունը պահանջում է զգոնություն։ Ուրախալի, որովհետև արջի վերադարձը վկայում է տարածքի էկոհամակարգի վերականգնման ու առողջության մասին», – նշում են գերատեսչությունից։
Նախարարությունից խնդրում են զբոսաշրջիկներին և տեղի բնակիչներին՝
- Լինել առավել զգոն՝ հատկապես մուտք գործելիս անտառային կամ բարձրադիր տարածքներ,
- Չթողնել ընտանի կենդանիներին առանց հովիվի կամ վերահսկողության,
- Խուսափել միայնակ շրջելուց վաղ առավոտյան կամ ուշ երեկոյան ժամերին։
«Արփի լիճ» ազգային պարկը ստեղծվել է 2009 թվականին։ Գտնվում է Շիրակի մարզում, Ամասիայի և Աշոցքի տարածաշրջաններում։
Պատճենել հղումը
