22-ամյա երիտասարդը 3 մլն դրամ է պահանջել 17-ամյա աղջկա մերկ լուսանկարները ծանոթներին չուղարկելու համար (ՎԻԴԵՈ)

ԵՐԵՎԱՆ, 1 հունիսի․ /Նովոստի-Արմենիա/․ Հունվարի 30-ին Քրեական ոստիկանության գլխավոր վարչությունում 17-ամյա մի աղջիկ հաղորդում է տվել, որ սոցիալական ցանցերից մեկի անհայտ օգտատերը 3 միլիոն դրամ է պահանջել՝ իր մերկ լուսանկարները և տեսանյութերն ընկերներին ու ծանոթներին չուղարկելու համար։ Այս մասին հայտնում է ՀՀ ոստիկանության մամուլի ծառայությունը։

Ըստ հաղորդագրության՝ քրեական ոստիկանության գլխավոր վարչությունում շորթման հատկանիշներով քրեական գործ է հարուցվել, որն ուղարկվել է Կենտրոն և Նորք-Մարաշ վարչական շրջանների քննչական բաժին՝ նախաքննության։

«Մարաշի քրեական հետախույզները օրերս կասկածվողին հայտնաբերեցին, բերման ենթարկեցին բաժանմունք, ապա ներկայացրին նախաքննական մարմնին։ Երիտասարդը ձերբակալվեց։ Նրա անձնական խուզարկությամբ հայտնաբերվեց և առգրավվեց բջջային հեռախոս, որի մեջ հաղորդում տված աղջկա մերկ տեսանյութերն էին։ Հարուցված քրեական գործի նախաքննությունը շարունակվում է»,- ասվում է գերատեսչության հաղորդագրության մեջ։-0-