Սողանք Լոռու մարզում. մոտ 200 խմ հողախառն զանգվածը պոկվել և փակել է փողոցը (ՖՈՏՈ)

ԵՐԵՎԱՆ, 27 ապրիլի./Նովոստի-Արմենիա/. Ապրիլի 27-ին, ժամը 13:18-ին Ճգնաժամային կառավարման ազգային կենտրոն տեղեկություն է ստացվել, որ Լոռու մարզի Շահումյան համայնքի 6-րդ փողոցի ծայրամասում տեղի է ունեցել սողանք (մոտ 180 խմ)։

Դեպքի վայր է մեկնել ԱԻՆ ՓԾ մարզային փրկարարական վարչության օպերատիվ խումբը:

«Պարզվել է, որ ապրիլի 27-ի ժամը 08:00-ի սահմաններում տեղի է ունեցել սողանք: Շահումյան համայնքի 6-րդ փողոցի տներից մեկի ձախակողմյան սարալանջից մոտ 200 խմ հողախառն զանգված պոկվել և մոտ 25 մ սահելով մոտեցել է փողոցի աջակողմյան հենապատին՝ ամբողջովին փակելով փողոցը. տանը վտանգ է սպառնում։ Առկա է ևս մոտ 200 խմ հողախառն զանգվածի տեղաշարժի վտանգ»,- նշվում է գերատեսչության հաղորդագրության մեջ:

Փրկարարների օգնության կարիքը չի եղել:-0-