Սկանդալ «Դայմոնդ» ռեստորանում. աշխատակցուհին ասել է, որ ռեստորանի տնօրենը 20 րոպե ծեծել է իրեն (ՎԻԴԵՈ)
21:22
01 Հուլիսի 2019
ԵՐԵՎԱՆ, 1 հուլիսի./Նովոստի–Արմենիա/. Բուզանդի փողոցում գտնվող ռեստորանում աշխատող 49-ամա մի կին շաբաթ օրը զանգել է ոստիկանություն և հայտնել, որ գումար է կորցրել՝ խնդրելով ոստիկան մոտենա:
Ոստիկանության Երևան քաղաքի վարչության ՊՊԾ գնդի ծառայողները մեկնել են ռեստորան, որտեղ նրանց է մոտեցել ահազանգող կինը և հայտնել, որ իրեն ծեծի են ենթարկել:
Կինը ոստիկաններին հայտնել է, որ գումարի հետ կապված խնդիր է առաջացել ռեստորանի 24-ամյա տնօրենուհու հետ, և իր նկատմամբ բռնություն են գործադրել:
Ինչպես հայտնում է ոստիկանության մամուլի ծառայությունը, պարզաբանումների համար տնօրենը հրավիրվել է բաժին, սակայն չի ենթարկվել ոստիկանության ծառայողների օրինական պահանջներին՝ դրսևորելով ոչ իրավաչափ վարքագիծ։
Նրան են միացել այլ անձինք ևս, որոնք դիմադրություն են ցույց տվել ոստիկանության ծառայողներին՝ պահանջելով հեռանալ։
Ոստիկանության ծառայողները ռեստորանից բերման են ենթարկել դիմադրություն ցույց տված բոլոր անձանց։
«Հունիսի 29-ին, ժամը 00.25-ին, ահազանգող կինը հաղորդում է տվել, որ մենեջերն ուժ գործադրելով իրեն տարել է ռեստորանի հանդերձարան և շուրջ հինգ րոպե զրկել ազատ տեղաշարժման իրավունքից, որից հետո տնօրենուհին երկու հոգու հետ շուրջ 20 րոպե սահմանափակել է իր ազատ տեղաշարժը, որի ժամանակ ծեծի են ենթարկել իրեն»,– ասվում է հաղորդման մեջ։
Քրեական գործ է հարուցվել մի քանի հոդվածների հատկանիշներով։
Նշանակվել է դատաբժշկական փորձաքննություն:
Տնօրենը ձերբակալվել է:
Ավելի վաղ հայկական լրատվամիջոցները գրել են, որ «Դայմոնդ» ռեստորանի տնօրենը և մի քանի աշխատողներ բերման են ենթարկվել։ -0-