ԵՐԵՎԱՆ, 18 սեպտեմբերի. /Նովոստի–Արմենիա/. Ռուսական ռազմական Իլ 20 ինքնաթիռը խոցվել է Միջերկրական ծովի վրա Սիրիայի ՀՕՊ համակարգի կողմից, քանի որ ռուսական օդանավը որպես վահան են օգտագործել իսրայելական F-16 կործանիչները։ Այդ մասին երեքշաբթի լրագրողներին է հայտնել ՌԴ ՊՆ պաշտոնական ներկայացուցիչ Իգոր Կոնաշենկովը, գրում է
ՏԱՍՍ–ը։
«Պաշտպանվելով ռուսական օդանավով` իսրայելցի օդաչուներն այն դրել են Սիրիայի ՀՕՊ հարվածի տակ։ Արդյունքում Իլ 20–ը, որի արդյունավետ արտացոլող մակերևույթն ավելի մեծ է, քան F-16ժի մոտ, խոցվել է С-200 համակարգով»,– ասել է գեներալը։
Կոնաշենկովը պարզաբանել է, որ սեպտեմբերի 17–ին Մոսկվայի ժամանակով մոտ 22։00–ին Իսրայելի չորս F-16 ռազմաօդային ուժեր կառավարվող ավիացիոն ռումբերով հարված են հասցրել Լաթաքիայի շրջանի սիրիական օբյեկտների նկատմամբ։ Հարվածն իրականացվել է ոչ մեծ բարձրությունից Միջերկրական ծովի կողմից։
Գեներալի խոսքով, իսրայելական ինքնաթիռները դիտավորությամբ վտանգավոր իրավիճակ են ստեղծել այդ հատվածում գտնվող նավերի և օդանավերի համար։
«Ռմբակոծումը կատարվել է ֆրանսիական ոչ մեծ Auvergne ֆրեգատի գտնվելու վայրից ոչ հեռու և Իլ 20–ի վայրէջքի վայրի մոտ»,– ասել է Կոնաշենկովը։
Ռուսական պաշտպանական գերատեսչության ներկայացուցիչը նշել է, որ ավիացիայի կառավարման իսրայելական միջոցները և F-16–ի օդաչուները «չէին կարող չտեսնել ռուսական օդանավը, քանի որ այն վայրէջք էր կատարում 5 կմ բարձրությունից։ Այնուամենայնիվ, նրանք դիտավորությամբ գնացել են այդ սադրանքին»,– ասել է նա։
ՌԴ–ն Իսրայելի գործողություններն ընկալել է որպես թշնամական և իրեն իրավունք է վերապահում պատասխան գործողություններ կատարել։ «Մենք մեզ պատասխան ադեկվատ գործողությունների իրավունք ենք վերապահում»,– ավելացրել է Կոնաշենկովը։ -0-
