ԵՐԵՎԱՆ, 18 հոկտեմբերի. /Նովոստի–Արմենիա/. Նորածիններ են հայտնաբերվել Գյումրու Ֆրիտյոֆ Նանսենի անվան երեխաների խնամքի պաշտպանության թիվ 2 գիշերօթիկ հաստատության բակում նախօրեի երեկոյան։
Ինչպես «Նովոստի–Արմենիա» գործակալությանը հայտնեց Շիրակի փոխմարզպետ Սոֆիա Հովսեփյանը, երկվորյակ տասն օրական տղաներին պոլիէթիլենային տոպրակում հայտնաբերել է գիշերօթիկի պահակը։ Նրանք տեղափոխվել են հատուկ խնամքի կարիք ունեցող երեխաների մանկատուն։
«Նորածիններին ցուցաբերվել է առաջին բուժօգնություն, երկու փոքրիկների առողջական վիճակն էլ լավ է, կերակրվել են, նրանց կյանքին վտանգ չի սպառնում»,– ասաց Հովսեփյանը։
Նրա խոսքով, պետք է հաստատվի երեխաների արյունակիցներ լինելու հանգամանքը, նաև հնարավորության դեպքում պարզվի, թե ինչու են ծնողները հիաժարվել երեխաներից, միգուցե նրանք ևս կյանքի դժվարին իրավիճակում են գտնվում:
«Եթե ծնողները կամ մայրը հայտնաբերվեն, կփորձենք պարզել այս քայլի պատճառները: Եթե խնդիրը միայն սոցիալական բնույթ ունեցավ, ապա կփորձենք օգնել ծնողներին ու հնարավորության դեպքում երեխաներին վերադարձնել ընտանիք, իսկ եթե ոչ,ապա համապատասխան ընթացակարգով երեխաները կհանձնվեն մանկատան խնամքին»,- պարզաբանել է Սոֆիա Հովսեփյանը: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում