ԵՐԵՎԱՆ, 19 օգոստոսի. /Նովոստի-Արմենիա/. Նախօրեին հրազենային վնասվածքներով «Աստղիկ» բժշկական կենտրոն է տեղափոխվել մի քաղաքացի:
Ինչպես հայտնում է shamshyan.com կայքը, վերջինս վնասվածքներ է ստացել է զույգ ոտնաթաթերի հատվածում: Տուժածը, ըստ աղբյուրի, հիվանդանոցում բժիշկներին, իսկ այնուհետև՝ ժամանած ոստիկանության Մալաթիայի բաժնի օպերատիվ խմբին հայտնել է, թե հրազենային վնասվածքները ստացել է Արմավիրի մարզի Ակնալիճ գյուղում՝ իրենց փողոցում քայլելիս:
Ոստիկանները պարզել են, որ վիրավորը նույն գյուղի բնակիչ, 37-ամյա Վարդան Հարությունյանն է: Մինչ Վ. Հարությունյանը փորձում էր Մալաթիայի ոստիկաններին մոլորեցնել, ոստիկանության ծառայողները՝ բաժնի պետ Արթուր Զոհրաբյանի գլխավորությամբ, պարզել են, որ Վ. Հարությունյաը նշված վնասվածքները ստացել է օգոստոսի 16-ին, ժամը 22:00-ի սահմաններում՝ Արմավիրի մարզի Տարոնիկ և Ակնալիճ գյուղերի խաչմերուկում անհայտ անձի կողմից ինքնաշենով արձակված կրակոցներից:
Ըստ աղբյուրի, նշված կրակոցների փաստով քրեական գործ է հարուցվել:
Նույն կայքն ավելի վաղ հայտնել է օգոստոսի 16-ին Արմավիրի մարզում տեղի ունեցած արտակարգ դեպքի մասին:
Ժամը 23:50-ի սահմաններում ոստիկանության Արմավիրի վարչություն ահազանգ էր ստացվել, որ Ակնալիճ գյուղի վարչական տարածքում ինքնաձիգերով կրակում են:
Ոստիկաններն ու քննիչները Երևան-Արմավիր ավտոճանապարհի Ակնալիճ և Տարոնիկ գյուղերի ճանապարհի խաչմերուկի հատվածում հայտնաբերել էին 5 հատ 5.45 մմ տրամաչափի ինքնաձիգից կրակված պարկուճներ, մի քանի հատ ինքնաշետ փայտյա մահակներ, ինչպես նաև ավտոմեքենայի ապակու կոտրված բեկորներ:
Նշված վայրում գետնին հայտնաբերվել էին նաև արնանման հետքեր: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում