ԵՐԵՎԱՆ, 6 մարտի./Նովոստի–Արմենիա/. Նախօրեին՝ մարտի 5-ին, խոշոր ու ողբերգական ավտովթար է տեղի ունեցել Արմավիրի մարզում:
Shamshyan.com–ի հաղորդմամբ, ժամը 22:00-ի սահմաններում Երևան քաղաքի Սարի Թաղի բնակիչ 33-ամյա Մահար Սաֆոյանը իր վարած Mercedes մակնիշի ի ավտոմեքենայով Փարաքար գյուղի վարչական տարածքում, դեպի Երևան-Արմավիր ավտոճանապարհ ընթանալիս, դուրս է եկել ճանապարհի երթևեկելի գոտուց, բախվել ծառերին և հայտնվել ճանապարհի մեջտեղում:
Վթարի հետևանքով Երևան քաղաքի Սարի Թաղի բնակիչ 31-ամյա Խաչատուր Շահբազյանը մարմնական վնասվածքներով տեղափոխվել է «Վաղարշապատ» բժշկական կենտրոն, իսկ մյուս ուղևորը՝ Փարաքար գյուղի բնակիչ, 34-ամյա Արթուր Տերոյանը, ում ավտոմեքենայից դուրս են բերել փրկարարները, օգտագործելով հատուկ տեխնիկա, տեղափոխվել է «Աստղիկ» բժշկական կենտրոն, սակայն, գիտակցության չգալով, մահացել է:
Կայքի հաղորդմամբ, փաստի առթիվ հարուցվելու է քրեական գործ ՀՀ ՔՕ 242 հոդվածի 2-րդ մասի (ճանապահատրանսպորտային պատահար, որ անզգուշությամբ առաջացրել է մարդու մահ) հատկանիշներով:–0–