Խոշոր ավտովթար՝ ավտոբուսի մասնակցությամբ․ 8 մարդ տուժել, անչափահաս տուժածի վիճակը միջին ծանրության է (ՎԻԴԵՈ)
ԵՐԵՎԱՆ, 16 մայիսի․/Նովոստի–Արմենիա/․ Այսօր խոշոր –ճանապարհատրանսպորտային պատահար է տեղի ունեցել Երևանի Սեբաստիայի փողոցում։
Ինչպես հայտնում է ՀՀ ոստիկանությունը, մայիսի 16-ին՝ ժամը 15․40-ին, ահազանգ է ստացվել, որ Սեբաստիա փողոցում՝ Եռաբլուրի մոտ, թիվ 23 երթուղին սպասարկող ավտոբուսը բախվել է ճամփեզրի էլեկտրասյանը և բենզալցակայանին։
Դեպքի վայր են մեկնել Ոստիկանության և Փրկարար ծառայության աշխատակիցներ, որոնք կատարել են իրավիճակից բխող գործողություններ։
Նախնական տվյալներով՝ ճանապարհատրանսպորտային պատահարի հետևանքով տուժել է 8 անձ։
Ինչպես հայտնում է ՀՀ առողջապահության նախարարությունը, 6 մեծահասակ տեղափոխվել է բժշկական կենտրոն։
2 անչափահասից մեկը հոսպիտալացվել է, մյուսը թեթև վնասվածք է ստացել, տրամադրվել է առաջին բուժօգնություն:
Ավելի ուշ ԱՆ–ից հայտնեցին, որ ավտոբուսի վթարի հետևանքով տուժած քաղաքացիներն անհրաժեշտ հետազոտություններն անցնելուց հետո ստացել են առաջին բժշկական օգնությունը և դուրս գրվել:
Բուժօգնությունը շարունակում է ստանալ անչափահաս տուժածը, նրա առողջական վիճակը գնահատվում է միջին ծանրության:
