ՀՀ ազգային գրադարանից գրքեր գողանալու մեղադրանք է առաջադրվել վեց հոգու, որոնցից մեկը Վրաստանի քաղաքացի է

Ազգային գրադարանից և ԵՊՀ գրադարանից գողություն կատարելու մեղադրանք է առաջադրվել վեց հոգու, որոնց թվում նաև Վրաստանի քաղաքացի կա, հաղորդում է ՀՀ հատուկ քննչական ծառայությունը:

Տեղեկատվության մեջ նշվում է, որ 2010-2011 թթ.-ին գողացված գրքերի արժեքը հասնում է մի քանի միլիոն դրամի:

Նախաքննությամբ ձեռք բերված ապացույցների համաձայն, Ազգային գրադարանի շենքի պահպանությունն իրականացնող՝ ՀՀ ոստիկանության ՊՊԳՎ ՀՁՊ գնդի ոստիկանն ու Վրաստանի քաղաքացին, նախնական համաձայնության գալով, 2010-2011թ.թ. պարբերաբար մուտք են գործել «Հայաստանի ազգային գրադարան» ՊՈԱԿ-ի գրապահոց և հափշտակել շուրջ 150 միավոր տարբեր գրքեր:

«Գրապահոցից գողություն կատարելու հերթական փորձը կատարվել է 2011 թվականի դեկտեմբերի 26-ին, սակայն հանցավոր խումբը վնասազերծվել է, և ՊՈԱԿ-ի շենք ապօրինի մուտք գործելու փորձ կատարած 4 անձինք անմիջապես բերման են ենթարկվել», - նշվում է տեղեկատվության մեջ:

Բացի այդ, քրեական գործի նախաքննությամբ ապացույցներ են ձեռք բերվել նաև առ այն, որ Վրաստանի նույն քաղաքացու դրդմամբ Երևանի պետական համալսարանի գրադարանի բաժնի վարիչը շուրջ 19 միավոր տարբեր գրքեր է վաճառել նրան:

Քրեական գործով մեղադրանք է առաջադրվել 6 անձի՝ բաժնի վարիչը մեղադրվում է յուրացում,  իսկ մնացած 5-ը, նրանց թվում՝ Վրաստանի քաղաքացին և  ոստիկանության երկու աշխատակիցները, ոստիկանության կրթահամալիրի քոլեջի ուսանողը մեղադրվում են գողություն և գողության փորձ կատարելու մեջ:-0-