Պանսիոնատի պահակը դաժան ծեծի է ենթարկել կնոջը, ինչի հետևանքով նա մահացել է. ՀՀ ոստիկանություն

Ստեփանավան քաղաքի  հանգստյան տներից մեկի պահակակը կասկածվում է երիտասարդ կնոջը դաժանաբար խեխի ենթարկելու մեջ, ինչի հետևանքով կինը մահացել է հիվանդանոցում, տեղեկանում ենք Հայաստանի ոստիկանության կայքից:

Հաղորդագրության համաձայն, նախօրեին Ստեփանավանի հիվանդանոցից տեղի ոստիկանության բաժին հաղորդում է ստացվել, որ մարմնական վնասվածքներով և անգիտակից վիճակում իրենց մոտ բուժօգնության է տեղափոխվել 29-ամյա Ինգա  Շիշլոն:

«Պարզվել է, որ նույն օրվա երեկոյան վիճաբանության ժամանակ, Ստեփանավանի հանգստյան տան 58-ամյա պահակը ձեռքերով, ոտքերով և ապակյա շշով հարվածներ է հասցրել Շիշլոյին՝ վնասվածքներ պատճառելով»,- ասվում է հաղորդագրության մեջ:

Նոյեմբերի 18-ին, ժամը 02.00-ին,  Ինգա Շիշլոն, գիտակցության չգալով, հիվանդանոցում մահացել է:

Փաստի առթիվ ՀՀ քրեական օրենսգրքի 104 հոդվածի  1-ին մասի հատկանիշներով հարուցվել է քրեական գործ:

«Հանցագործություն կատարած անձը ձերբակալված է: Կատարվում է նախաքննություն»,- ասվում է հաղորդագրության մեջ: -0-