Նախորդ գիշեր ՀՀ Գեղարքունիքի մարզի Մարտունի-Վարդենիս ավտոճանապարհի 21-րդ կմ-ում տեղի ունեցած ՃՏՊ-ի հետևանքով հինգ մարդ է զոհվել, հաղորդում է ՀՀ ԱԻՆ Փրկարար ծառայությունը:
«Դեռևս չպարզված հանգամանքներում իրար են բախվել «ՈՒԱԶ», «Վազ֊ 2106» և «Գազ֊ 24» մակնիշի մեքենաները, ինչի հետևանքով «Վազ֊ 2106»-ի վարորդ 32-ամյա Մ. Օհանյանը, ինչպես նաև ուղևորներ 55-ամյա Կարեն Բադալյանը, 22-ամյա Արկադի և 25-ամյա Արա Թադևոսյանները տեղում մահացել են», - նշվում է տեղեկատվության մեջ:
«ՈՒԱԶ»-ի վարորդ 26-ամյա Մ. Զարոյանը, ինչպես նաև ուղևորներ 21-ամյա Մանվել Ենուկյանը, 26-ամյա Դավիթ Գասպարյանն ու 27-ամյա Սարգիս Պողոսյանը տարբեր աստիճանի մարմնական վնասվածքներով տեղափոխվել են հիվանդանոց, որտեղ Պողոսյանը մահացել է:
«Գազ 24»-ի վարորդ 23-ամյա Ոսկան Բադալյանը ստացել է թեթև մարմնական վնասվածքներ և հրաժարվել շտապօգնության բժիշկների օգնությունից:
Բժիշկները Զարոյանի առողջական վիճակը գնահատել են ծանր, իսկ Սամվել Ենուկյանի և Դավիթ Գասպարյանի առողջական վիճակը գնահատել են բավարար:-0-
