ԵՐԵՎԱՆ, 11 օգոստոսի. /Նովոստի-Արմենիա/. Խոշոր եղջերավոր կենդանիների մոտ պաստերելյոզ է ախտորոշվել (սուր ինֆեկցիոն հիվանդություն) Արագածոտնի մարզի Ուշի գյուղում, հինգշաբթի հայտնում է հանրապետության Գյուղատնտեսության նախարարության մամուլի ծառայությունը։
«Հիվանդության գրանցման առաջին դեպքից 4 գլուխ խոշոր եղջերավոր կենդանիներ, որոնց մոտ առձանագրվել են հիվանդությանը բնորոշ կլինիկական ախտանշաններ, ենթարկվել են հարկադիր սպանդի»,- ասվում է հաղորդագրությունում։ Հիվանդության հայտնաբերման ամսաթիվը չի նշվում։
Հիվանդության դեպքի գրանցման անմիջապես հաջորդ օրը, համայնքի անասնաբույժի կողմից իրականացվել են անհրաժեշտ բոլոր միջոցառումները՝ հիվանդ կենդանիներին ներարկել են իմուն շիճուկ, իսկ պայմանական առողջները ենթարկվել են հակապաստերելյոզային պատվաստման, իրականացվել է տարածքի ախտահանում:
Այդ միջոցառումներից հետո մինչ այժմ հիվանդության նոր դեպքեր չեն արձանագրվել:
Պաստերելյոզ հիվանդության նկատմամբ ՀՀ Գյուղատնտեսության նախարարության «Անասնաբուժասանիտարիայի սննդամթերքի անվտանգության և բուսասանիտարիայի ոլորտի ծառայությունների կենտրոն» ՊՈԱԿ-ի կողմից իրականացվում է խիստ հսկողություն:
Պաստերելյոզը (Pasteurellosis)՝ հեմոռագիկ սեպտիմեցիան, գյուղատնտեսական, վայրի կենդանիների և թռչունների վարակիչ հիվանդություն է: Վարակը կարող է փոխանցվել օդակաթիլային ճանապարհով, համատեղ պահվածքի դեպքում կերի և ջրի միջոցով, վնասված մաշկի միջոցով:
Խոշոր եղջերավոր կենդանիների մոտ այն ընթանում է հիմնականում սուր, հազվադեպ՝ ենթասուր ձևերով: Այս հիվանդության ժամանակ առավել հաճախ ախտահարվում են թոքերը: Գաղտնի շրջանը տևում է 6-48 ժամ: Հիվանդության առաջին ախտանշաններն են՝ մարմնի ջերմաստիճանի կտրուկ բարձրացում մինչև 40 աստիճան և ավելի, ընդհանուր թուլություն, ծանր շնչառություն, հաճախակիացած զարկերակ, մկանային դող, ախորժակի լիառժեք բացակայություն: Պաստերելյոզից կենդանու անկման հավանականությունը կազմում է 10-75 տոկոս, կախված նրա օրգանիզմի դիմադրողականությունից, հիվանդության ընթացքից և ժամանակին ստացած անասնաբուժական միջամտությունից: Հիվանդ կենդանիներից ստացված նմուշների բակտերիոլոգիական հետազոտությունները հնարավորություն են տալիս անսխալ ախտորոշել պաստերելյոզը:
Կենդանիների լավ պահվածքը հանդիսանում է այս հիվադության դեմ պայքարի լավագույն միջոցը: Հիվանդ կենդանիներին անհրաժեշտ է մեկուսացնել, բուժել, իսկ նրանց գտնվելու վայրը՝ ախտահանել: -0-
