Հրապարակվել են Երևանում 7 մեքենաների մասնակցությամբ ողբերգական ավտովթարի կադրերը (ՎԻԴԵՈ)
ԵՐԵՎԱՆ, 9 դեկտեմբերի․/Նովոստի–Արմենիա/․ Հրապարակվել են դեկտեմբերի 5–ին Երևանի Պռոշյան փողոցում 7 մեքենաների մասնակցությամբ ողբերգական ավտովթարի կադրերը։
Ավելի վաղ հայտնի էր դարձել, որ դեկտեմբերի 5–ին Ժամը 23:30-ի սահմաններում Պռոշյան փողոցի թիվ 14 հասցեի դիմացի հատվածում բախվել են Երևանում հաշվառված 29-ամյա Գ․ Մ․–ի վարած «Tesla» մակնիշի, Շիրակի մարզում հաշվառված 28-ամյա Ս․ Գ․–ի «Kia Forte» մակնիշի և Երևանում հաշվառված 21-ամյա Մ․ Շ․–ի վարած «Hyundai» մակնիշի ավտոմեքենաները։
Վթարի հետևանքով վարորդներից Ս․ Գ․–ն տեղում մահացել է, իսկ «Tesla»-ի վարորդ Գ. Մանուկյանը տեղափոխվել է հիվանդանոց։
Բախման հետևանքով նշված ավտոմեքենաները բախվել են ճանապարհի թույլատրելի հատվածում կայանված «BYD», «Hyundai», «Nissan», «Opel Astra» մակնիշի ավտոմեքենաներին։
Կայքի տեղեկություններով՝ «Tesla»-ի վարորդ Գ. Մանուկյանը դեպքի պահին գտնվել է ոչ սթափ վիճակում և իր մոտ չի ունեցել հայկական վարորդական վկայական։ Ավելի ուշ հայտնի էր դարձել, որ Մանուկյանը ձերբակալվել է, նրան կալանավորելու միջնորդություն է ներկայացվել, սակայն դատարանը որոշել է կիրառել 10 մլն դրամի գրավ և տնային կալանք:
