ԵՐԵՎԱՆ, 4 նոյեմբերի. /Նովոստի–Արմենիա/. Հայաստանի առողջապահության նախարար Արմեն Մուրադյանը նախօրեին մեկնել է Տուլա ՃՏՊ–ում տուժածներին օգնություն ցուցաբերելու համար, հայտնում է Առողջապահության նախարարության մամուլի ծառայությունը։
Մուրադյանը Տուլա է մեկնել Մոսկվա-Երևան ուղղությամբ ուղևորատար ավտոբուսի վթարի կապակցությամբ ՀՀ Նախագահ Սերժ Սարգսյանի հանձնարարությամբ ՀՀ վարչապետի որոշմամբ ստեղծված հանձնաժողովի կազմում և հանդիպել է տուժածների հետ։
Հանձնաժողովը տեղում ռուս գործընկերների հետ կհամակարգի զոհված ուղևորների աճյունները Հայաստան տեղափոխելու, տուժած քաղաքացիներին և նրանց ընտանիքներին անհրաժեշտ օգնություն ցուցաբերելու աշխատանքները:
ՌԴ օմբուդսմենը կօգնի Տուլայի ՃՏՊ–ում զոհվածների և տուժածների ընտանիքներին>>
Տուժածները բուժում են անցնում երեք հիվանդանոցներում։
Ավելի վաղ ՌԴ առողջապահության նախարար Վերոնիկա Սկվորցովան իր հայ գործընկերոջ հետ զրույցում ասել է, որ տուծաժների հետ կապված իրավիճակն իր ուշադրության կենտրոնում է։
Պաշտոնական տվյալներով, ՃՏՊ–ի հետևանքով զոհվել է 8 մարդ, 32–ը հոսպիտալացվել է, նրանցից 10–ը վերակենդանացման բաժնում է, 8 քաղաքացիներ ամբուլատոր բուժում են ստացել։ -0-