ԵՐԵՎԱՆ, 1 հոկտեմբերի. /Նովոստի-Արմենիա/. Այսօր դաժան ու ողբերգական ավտովթար է տեղի ունեցել Արմավիրի մարզում։
Ժամը 17։00-ի սահմաններում Lexus մակնիշի ավտոմեքենայի վարորդը Երևան-Արմավիր ավտոճանապարհի 26-րդ կմ հատվածում մխրճվել է իր առջևով ընթացող ԶԻԼ մակնիշի ավտոմեքենայի մեջ։
Ինչպես հայտնել է
shamshyan.com կայքը, վթարի հետևանքով 1 մարդ տեղում մահացել է, մյուսը մահացել է հիվանդանոցում: Ըստ կայքի, մահացածները մայր ու դուստր էին:
Դեպքի վայր են ժամանել Ճանապարհային ոստիկանության 2-րդ սպայական գումարտակի 1-ին վաշտի 1-ին դասակի աշխատակիցները, ոստիկանության Արմավիրի մարզային վարչության օպերատիվ խումբը:
Հարուցվել է քրեկան գործ ՀՀ ՔՕ-ի 242 հոդվածի 3-րդ մասի (Ճանապարհային երթեւեկության եւ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ) հատկանիշով:
Կայքի փոխանցմամբ, դեպքի վայրում հավաքվածներն ասում էին, որ Lexus-ի վարորդն ու ուղևորները մասնակցում էին հարսանեկան արարողության: Ըստ նրանց հայտարարության մեքենան վարել է Երևան քաղաքի Մալաթիա-Սեբաստիա վարչական շրջանի Իսակովի պողոտայի 42 / 2 շենքի բնակիչ 19-ամյա Լևոն Արտեմի Սարգսյանը։
Ոստիկանությունն ու քննչական բաժինը պարզում են նաև այս տեղեկության իսկությունը։ -0-