Գյումրում կրակոցներ են հնչել. կա վիրավոր

ԵՐԵՎԱՆ, 26 հունիսի. /Նովոստի–Արմենիա/. Նախօրեի երեկոյան Ոստիկանություն ահազանգ է ստացվել, որ Գյումրու Սայաթ Նովայի փողոցում կրակոցներ են հնչել:

Ինչպես «Նովոստի–Արմենիա» գործակալությանը հայտնեցին ոստիկանության մամուլի ծառայությունից, կրակել են 22։50–ի սահմաններում։

Հրաձգության հետևանքով հրազենային վերքեր է ստացել մի երիտասարդ, ով տեղափոխվել է Գյումրու բժշկական կենտրոն։


Հանգամանքները պարզվում են, քննչական վարչությունում նյութեր են նախապատրաստվում: Դեպքին մասնակից անձանց շրջանակը ճշտված է, իրականացվում են որոնողական աշխատանքներ, տեղեկանում ենք ոստիկանության մամուլի ծառայությունից։

Բուժօգնության դիմած երիտասարդը գիշերը վիրահատվել է, այս պահին նրա վիճակը գնահատվում է կայուն ծանր:

Ինչպես Tert.am-ին է հայտնել Գյումրու բժշկական կենտրոնի բուժական գծով փոխտնօրեն Արմեն Խաչատրյանը, երիտասարդն ուներ թափանցող հրազենային վերք, «վնասվել էին աղիները, վիրահատել ենք, դրենավորել, այժմ գտնվում է վերակենդանացման բաժանմունքում, նրան վիճակը համապատասխանում է կրած վիրահատությանը»:

Ըստ բժշկի՝ երիտասարդն ինքնուրույն շնչում է, ունի գիտակցություն: -0-