ԵՐԵՎԱՆ, 1 դեկտեմբերի. /Նովոստի–Արմենիա/. Կիբերանվտանգության գործում մասնագիտացած Check Point ընկերության մասնագետները հայտնաբերել են Gooligan վնասակար ծրագրային ապահովումը, որը կոտրում էր Android սարքերը և գրոհում Google-ի օգտատերերի աքաունթները, հաղորդվում է
telecom.arka.am–ը` հղում անելով RBC-ին:
Հարձակման են ենթարկվել ավելի քան 1 մլն աքաունթներ, ինչը Check Point-ում անվանում են ռեկորդային թիվ:
Ընկերության տվյալներով, օրական վնասակար ԾԱ-ի զոհ են դարձել 13 հազար շարժական սարքեր, որոնք աշխատում են Android 4 (Jelly Bean, KitKat) և Android 5 (Lollipop) հարթակներում: Երբ օգտատերը Google Play-ից ներբեռնում էր վարակված հավելվածը, վիրուսը հայտնվում էր նրա սարքի մեջ։
Ապա չարագործները հնարավորություն էին ստանում օգտատիրոջ անունից ներբեռնումներ կատարել Google Play-ից, գնահատել դրանք, եկամուտ կուտակել: Կոտրված սարքերի վրա օրական ներբեռնվում էր ոչ պակաս, քան 30 հազար հավելված, իսկ «վնասատուի» հայտնվելուց հետո տեղի է ունեցել 2 միլիոնից ավել ներբեռնում, նշում է Check Point-ը:
Գողացված տեղեկատվությունը հասանելի էր դարձնում նաև օգտատիրոջ տվյալները Google Play-ում, Gmail-ում, Google Photos-ում, Google Docs-ում, G Suite-ում, Google Drive-ում: Check Point ընկերությունը հայտնել է, որ այժմ Google-ի հետ միասին աշխատում են կիբերհարձակման հետևանքների վերացման ուղղությամբ: -0-