Երևանի «Թեքեյան» կենտրոնում փոխգնդապետ է դանակահարվել

ԵՐԵՎԱՆ, 1 փետրվարի. /Նովոստի–Արմենիա/. Հինգշաբթի դանակահարության դեպք է տեղի ունեցել Երևանում։

Առավոտյան ժամը 08։30-ի սահմաններում Խանջյան փողոցում գտնվող «Թեքեյան» մշակութային կենտրոնի մոտից մի քաղաքացի է հոսպիտալացվել։

Ինչպես հայտնում է shamshyan.com կայքը, պարզվել է, որ դանակահարվածը Երևանի բնակիչ՝ 43-ամյա Գ. Հ.-ն է, ով ուժային կառույցներից մեկի աշխատակից է, կոչումով փոխգնդապետ։


Կայքի տեղեկացմամբ, տղամարդը թոքի հատվածում ստացել է սուր կտրող-ծակող առարկայից ստացած վնասվածք։

Ոստիկանության ծառայողները պարզել են կասկածյալի ինքնությունը, ով Աբովյան քաղաքի բնակիչ, 39-ամյա Վարդան Գ.-ն է։ Ըստ աղբյուրի, դանակահարությունը տեղի է ունեցել «Թեքեյան» կենտրոնի 1-ին հարկում։

Ոստիկանության Կենտրոնական բաժնի քրեական հետախուզության բաժանմունքի ծառայողները կասկածյալին հայտնաբերել և բերման են ենթարկել Ոստիկանության Կենտրոնական բաժին։

Փաստի առթիվ հարուցվել է քրեական գործ։ Կասկածյալը քննիչի որոշմամբ ձերբակալվել է։ -0-