ԵՐԵՎԱՆ, 14 փետրվարի. /Նովոստի-Արմենիա/. Փետրվարի 12-ին Ալավերդու բժշկական կենտրոնում 33-ամյա ծննդկան է մահացել:
Ինչպես հաղորդում է Tert.am-ը` հղում անելով ծննդկանի ամուսնուն՝ Արկադի Դավթյանին, Անժելա Դավթյանը հիվանդանոց է տեղափոխել փետրվարի 9-ին, որպեսզի լինի բժիշկների հսկողության տակ, իսկ 12-ին` որդու լույս աշխարհ բերելուց հետո, կինը մահացել է:
Ամուսնու խոսքով, բժիշկներն ասել են, որ ծննդաբերության ժամանակը մի քանի օր անցել է, սակայն խնդիրներ չկային:
Թեղուտ գյուղի բնակիչ Արկադի Դավթյանը պարբերականին հայտնել է, որ որդին ծնվել է բնական ճանապարհով և գտնվում է Երևանի «Սուրբ Աստվածամայր» բժշկական կենտրոնում, սակայն կենտրոնից հրաժարվել են պարբերականին տվյալներ հայտնել երեխայի առողջական վիճակի մասին:
Ալավերդու բժշկական կենտրոնի տնօրեն Ստեփան Մոսինյանը պարբերականին հայտնել է, որ ծննդկանի արգանդը պատռվածք է ունեցել, որը տեղի է ունեցել կամ մինչև ծննդաբերելը, կամ ծննդաբերուց հետո:
«Տեղի է ունեցել արգանդի պատռվածք և տրոմբոէմբոլիա հարցականով, որովհետև ծնունդ ընդունող մանկաբարձ-գինեկոլոգը ծննդաբերությունից հետո ձեռքով մտել է խոռոչը` շոշափելով հայտնաբերել է արգանդի պատռվածքը, իսկ նման դեպքերում չի բացառվում, որ լինի տրոմբոէմբոլիա հարցականով, որի վերջնական պատասխանը կտա դատաբժշկական փորձաքննությունը, որն ընթացքում է», - մեջբերում է պարբերականը բժիշկի խոսքերը: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում