Պարզվել է Բաշկիրիայում հայերի մասնակցությամբ գրանցված միջադեպի պատճառը

ԵՐԵՎԱՆ, 29 հոկտեմբերի. /Նովոստի–Արմենիա/. Պարզվել է Բաշկիրիայում յոթ հայերի մասնակցությամբ գրանցված միջադեպի պատճառը։

Բաշկիրիայի Սալավատ քաղաքում հոկտեմբերի 29–ի գիշերը դիմակավորված անհայտ անձինք ավտոմեքենայով մոտեցել են ավտոսերվիսին և կրակ բացել յոթ մարդու ուղղությամբ։ Բոլոր տուժածներն ազգությամբ հայեր են։ Նրանք տեղափոխվել են հիվանդանոց։ Բոլոր տուժածների վիճակը գնահատվում է ծանր։
 
Նախնական տվյալներով` տուժածները միջադեպից մի քանի ժամ առաջ հանդիպել են անհայտ անձանց հետ ։
LifeNews–ը հաղորդում է, որ կրակոցներից առաջ ճանապարհային  միջադեպ է տեղի ունեցել։

Իրավապահ մարմինների աղբյուրի խոսքով` երեկոյան, կրակոցներից առաջ, տուժածները մասնակցել են ռեստորանում կազմակերպված մեծ խնճույքի, որի ժամանակ նրանցից մեկին զանգահարել են և օգնություն խնդրել. վարորդը մեքենայով ընկել էր ձորը` ռեստորանից ոչ հեռու։ Տուժածները որոշել են օգնել։

«Ավտոմեքենան ձորից դուրս բերելու ժամանակ նրանց են մոտեցել երեք անհայտ անձինք և սկսել բջջային հեռախոսով տեսանկարահանել տեղի ունեցածը` ընթացքում բարձր մեկնաբանելով», – նշել է աղբյուրը։ «Դրանից հետո լեզվակռիվ է սկսվել և անհայտ անձանցից մեկը տրավմատիկ ատրճանակով մի քանի անգամ կրակել է տղամարդկանցից մեկի դեմքին»,– ընդգծում է աղբյուրը։

Անհայտ անձինք հեռացել են, իսկ տուժածը տեղափոխվել է հիվանդանոց։ Մյուսները վերադարձել են ավտոսերվիս` միջադեպը քննարկելու նպատակով։ Այդ ժամանակ ավտոսերվիս են ներխուժել անհայտ անձինք և կրակ բացել նրանց ուղղությամբ։ –0–