Տուլայի դատախազությունը ներկայացրել է Երևան ընթացող ավտոբուսի վթարի հիմնական վարկածը

ԵՐԵՎԱՆ, 18 նոյեմբերի. /Նովոստի–Արմենիա/. Տուլայի շրջանի դատախազ Ալեքսանդր Կոզլովը «Տուլսկիյե իզվեստիյա» հասարակական-քաղաքական թերթի խմբագրության ուղիղ կապի ժամանակ ներկայացրել է  Մոսկվա-Երևան ուղերթով ընթացող ավտոբուսի վթարի հիմնական վարկածը, հաղորդում է Ինտերֆաքսը:

Նոյեմբերի 3–ի լույս գիշերը Մոսկվա–Երևան ուղևորվող ավտոբուսը կողաշրջվել է Տուլայի մարզի Ուզլովայա շրջանում։ «Կինգ Դելյուքս» ՍՊԸ-ին պատկանող ավտոբուսում եղել էր 63 մարդ: Վթարի հետևանքով զոհվել է 9 մարդ, 30 հոգի ստացել էին տարբեր կարգի վնասվածքներ։ Բոլոր ուղևորները Հայաստանի քաղաքացիներ էին:

«Հիմնական վարկածը ճանապարհին վարորդի անուշադրությունն է: Գործը Ռուսաստանի ՆԳՆ քննչական ստորաբաժանման վարույթում է, այնտեղ կշարունակվի գործի քննությունը: Մեր աշխատակիցները լավ են աշխատել: Հիմա վերլուծություններ է կատարվում երկու ծառայությունների փոխգործակցության  հարցով, որպեսզի հաջորդ անգամ բոլոր կառույցներն ավելի լավ աշխատեն: Հիմա բոլոր ծառայությունները շատ արդյունվետ են աշխատել»,-ասել է Կոզլովը:

Մեղադրանք է առաջադրվել Մոսկվա–Երևան ավտոբուսի վարորդին>>

Նրա խոսքերով, վթարի պահին ավտոբուսն ընթացել է  117 կիլոմետր ժամ արագությամբ, այն դեպքում, երբ ճանապարհի այդ հատվածում արագությունը սահմանված է ժամում 70 կիլոմետր: Տրանսպորտային միջոցը նորոգվել էր վթարից մի քանի ժամ առաջ և սարքին վիճակում է եղել, բայց փորձաքննություն այնուամենայնիվ նշանակված է:

Տուլայի ՃՏՊ–ից հետո տվյալ փաստով ավտոբուսի վարորդի նկատմամբ հարուցվել է քրեական գործ «Ճանապարհային երթևեկության կանոնների խախտում, որն անզգուշությամբ հանգեցրել է երկու կամ ավել անձանց մահվան» հոդվածի հատկանիշներով, նա ձերբակալվել է։Պատիժը նախատեսում է ազատազրկում մինչև յոթ տարի ժամկետով։

Դիտարկվել են պատահարի երկու հավանական պատճառներ` վարորդի քնած լինելը ղեկին և տրանսպորտային միջոցի տեխնիկական անսարքությունը:-0-