Երևանում տաքսու ուղևորը վերցրել է վարորդի բջջայինը, իջել մեքենայից ու հեռացել անհայտ ուղղությամբ` չվճարելով 19 հազար դրամ ուղեվարձը

ԵՐԵՎԱՆ, 28 ապրիլի./Նովոստի–Արմենիա/. Ապրիլի 27-ին, ժամը 19.45-ին, տաքսի ծառայության մի վարորդ ոստիկանության Քանաքեռ-Զեյթունի բաժնում խարդախության վերաբերյալ հաղորդում էր տվել, հաղղորդում է ՀՀ ոստիկանությունը:

Ըստ հաղորդման` նախորդ օրը, ցերեկվա ժամը չորսին, տաքսիստը Վանաձորից Երևան է տեղափոխել Գուրգեն ներկայացած մի անձի, որը մայրաքաղաքի Ազատության պողոտայում, զանգելու պատրվակով, վարորդից վերցրել է բջջային հեռախոսը, իջել մեքենայից և հեռացել անհայտ ուղղությամբ` խաբեությամբ տիրանալով հեռախոսին և չվճարելով 19 հազար դրամ ուղեվարձը:

Հանցագործությունը հնարավորինս արագ բացահայտելու համար Քանաքեռ-Զեյթունի քրեական հետախույզները ձեռնարկել են անհրաժեշտ միջոցառումներ, նաև համագործակցել ոստիկանության Վանաձոր քաղաքի Բազումի բաժնի գործընկերների հետ, և հաղորդում ստանալուց մոտ մեկ ժամ անց «Հաղթանակ» զբոսայգում ձերբակալել և Քանաքեռ-Զեյթունի բաժին են տեղափոխել Երևանի Մոլդովական փողոցի բնակիչ, 31-ամյա մի երիտասարդ: Նա խոստովանել է արարքը և, կազմված փաստաթղթերով հանդերձ, ներկայացվել քննչական բաժին:

Ձեռնարկվում են միջոցառումներ՝ դեպքի հանգամանքները պարզելու ուղղությամբ:–0–