Երևանում հայտնաբերել են պարանոցը կտրած կնոջ. կասկածյալը նրա որդին է

ԵՐԵՎԱՆ, 17 ապրիլի./Նովոստի–Արմենիա/. Նախօրեին՝ ապրիլի 16-ին, առանձնակի դաժանությամբ դեպք է տեղի ունեցել Երևանում։

Shamshyan.com–ի հաղորդմամբ, ժամը 14։50-ի սահմաններում Երևանի շտապօգնության բժիշկների հերթապահ խումբը ահազանգել է Ոստիկանության Արաբկիրի բաժին և հայտնել, որ բժիշկների հերթապահ խումբը կանչով մեկնել է Սևքարեցի Աաքոյի փողոցում գտնվո հյուրանոցային համալիրներից մեկը, որտեղ սենյակներից մեկում հայտնաբերել են ծայրահեղ ծանր վիճակում գտնվող կնոջ`արնաշաղախ վիճակում։

Պարզվել է, որ կնոջը պարանոցը կտրած է։

Մինչ ոստիկանների ժամանումը, բժիշկները տեղում առաջին բուժօգնությունն են ցուցաբերել պարանոցը կտրած կնոջը, ապա նրան ծայրահեղ ծանր ախտորոշմամբ տեղափոխել հիվանդանոց։

Տեղում ոստիկանների և պարեկների կողմից վնասազերծվել է մի երիտասարդ ու հոսպիտալացվել, քանի որ մարմնական վանսվածքներ էր ստացել։

Նշված հյուրանոցային համալիրի բակային հատվածում` մուտքի մոտ պարեկներն ու ոստիկանները հայտնաբերել են դանակ, որի վրա առկա են եղել արնանման հետքեր։

Ըստ նախնական տեղեկությունների՝ հնարավոր է՝ այդ դանակը հանցագործության գործիքն է։

Նախնական վարկածով, հոսպիտալացված երիտասարդը ենթադրյալ կասկածյալն է, իսկ կինը նրա մայրն է։
Դեպքի փաստով նախաձեռնվել է քրեական վարույթ։ Ոստիկանությունն ու քննչական բաժինը պարզում են հիվանդանոց տեղափոխված անձանց ինքնությունը։

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով։–0–