Երևանում հարսանիքն ավարտվել է ծեծկռտուքով, վրաերթի են ենթարկվել քաղաքացիներ, հնչել է կրակոց

ԵՐԵՎԱՆ, 24 փետրվարի./Նովոստի–Արմենիա/. Երեկ՝ փետրվարի 23-ին, կրակոցներ են հնչել Երևանում։

Shamshyan.com–ի հաղորդմամբ, ժամը 23։15-ի սահմաններում ՀՀ ներքին գործերի նախարարության, Ոստիկանության օպերատիվ կառավարման կենտրոն մի քանի քաղաքացիներից, րոպեների տարբերությամբ, ահազանգ է ստացվել, որ Կիևյան փողոցում գործող «ՍԱՍ» սուպերմարկետի մոտ հնչել են կրակոցներ և սպիտակ գույնի ավտոմեքենան վրաերթի է ենթարկել 2 քաղաքացու։

Մինչ ոստիկաններն ու քննիչներն աշխատել են դեպքի վայրում, «Արմենիա» բժշկական կենտրոնից ահազանգ է ստացվել, որ իրենց մոտ թ տեղափոխվել 2 քաղաքացի, ովքեր հայտնել են, որ վնասվածքները ստացել են վրաերթի ենթարկվելուց հետո։

Հիվանդանոց մեկնած ոստիկանները պարզել են, որ վիրավորները Երևանի բնակիչներ 25-ամյա Քրիստինա Ս․-ն է և 90-ամյա Ծովինար Շ․-ն։

Ոստիկանները պարզել են, որ նշված անձինք հիվանդանոց են տեղափոխվել Կիևյան 1 հասցեում գործող «ՍԱՍ» սուպերմարկետի մոտից։

Կայքի տեղեկություններով՝ ոստիկանները, պարեկներն ու քննիչները պարզել են, որ Կիևյան 1 հասցեում գործող «Լա Վիստա» ռեստորանային համալիրում տեղի ունեցած հարսանեկան արարողության մասնակիցներ՝ Երևանի բնակիչներ 27-ամյա Կ. Մինասյանը, 37-ամյա Դ. Բուռնազյանը, 38-ամյա Ն. Դաբաղյանը անձնական հարցերի շուրջ վիճաբանել են նույն հարսանեկան արարողության մասնակիցներից Երևանի բնակիչ 29-ամյա Ա. Ասատրյանի, Արարատի մարզի բնակիչ 20-ամյա Է. Ասատրյանի և Գեղարքունիքի մարզի բնակիչ 25-ամյա Հ. Մանուկյանի հետ։ Վիճաբանությունն այնուհետև վերածվել է ծեծկռտուքի, որի ժամանակ փոխադարձ հնչեցրել են հայհոյանքներ։

Վիճաբանության ընթացքում Կ․ Մինասյանն իր մոտ պահվող գազային ատրճանակից կրակոցներ է արձակել, ապա նստել իր կողմից շահագործվող Opel մակինշի ավտոմեքենան և սկսել անկանոն վարել, այդ ընթացքում վրաերթի ենթարկելով Քրիստինա Ս․-ին և Ծովինար Շ․-ին, այնուհետև հեռացել։ Հասնելով Կոմիտասի պողոտա 16 հասցե այնտեղ ևս կրակոց է արձակել ու վերադարձել է։

Դեպքի վայրում պարեկները հայտնաբերել են վթարված Mercedes մակնիշի ավտոմեքենա, որին, ըստ օպերատիվ տեղեկությունների, բախվել է Կ․ Մինասյանն իր Opel մակնիշի ավտոմեքենայով։

Դեպքի վայրում հայտնաբերվել է 1 պարկուճ, Opel և Mercedes մակնիշի ավտոմեքենաներ, ինչպես նաև կոտրված ծաղկամաններ։

Opel-ի դիմապակու վրա հայտնաբերվել է հող, որն ըստ տեղեկությունների՝ ծաղկամանների միջից է լցվել մեքենայի վրա, երբ մարդիկ, բարկացած, ծաղկամաններ են նետել Opel-ի ուղղությամբ։

Նշված անձինք ներկայացվել են Արաբկիրի քննչական բաժին։

Կայքի տեղեկություններով, վրաերթի ենթարկվածները հարսնաեկան արարողության մասնակիցներից են եղել։–0–