Որդին ստել էր, թե մայրը հանկարծամահ է եղել. դաժան դեպք Գեղարքունիքում

ԵՐԵՎԱՆ, 7 մայիսի./Նովոստի-Արմենիա/. Երեկ՝ մայիսի 6-ին, առանձնակի դաժանությամբ սպանություն է տեղի ունեցել Գեղարքունիքի մարզում:

 Shamshyan.com-ի հաղորդմամբ, ժամը 20:50-ի սահմաններում «Սևան» բժշկական կենտրոնից ոստիկանության Սևանի բաժին ահազանգ է ստացվել,որ շտապօգնության բժիշկների հերթապահ խումբը կանչով մեկնել է Լճաշեն բնակավայրի տներից մեկը, որտեղ հայտնաբերել են կնոջ դի, և ըստ որդու հատարարության՝ մայրը հանկարծամահ է եղել:

Ոստիկաններն ու քննիչները նշված բնակավայրի տան ննջասենյակում՝ անկողնում, հայտնաբերել են նույն տան բնակիչ 86-ամյա Կատյա Խ.-ի դին՝ դեմքի և պարանոցի շրջաններում բռնության հետքերով:

Տանը մահացածի որդին ոստիկաններին ու քննիչներին փորձել է համոզել, որ մայրը հանկարծամահ է եղել ու մինչ դեպքի վայրում աշխատում էր դատական բժիշկը, ոստիկանները պարզել են, որ որդու հայտնածը չի համապատասխանում իրականությանը:

Դատաբժշիկը հայտնում է, որ մահացածի աչքերի շրջանում առկա են կապտուկներ, քթի և բերանի շրջանում՝ արնանման հետքեր, պարանոցի շրջանում՝ քերծված վերքեր, իսկ աջ ձեռքի հատվածում՝ կապտուկ: Ոստիկանները մահացածի որդուն, Երևանի բնակիչ, 50-ամյա Զավեն Խ.-ին, սպանութուն կատարելու հիմնավոր կասկածանքով ձերբակալել և տեղափոխել են ոստիկանության Սևանի բաժին, որտեղից էլ ներկայացրել են Սևանի քննչական բաժին:

Քննիչի որոշմամաբ, Զավեն Խ.-ն ձերբակալվել է:

Դեպքի փաստով սպանություն հատկանիշներով նախաձեռնվել է քրեական վարույթ: Քննիչի որոշմամբ, նշանակվել է դիակի դատաբժշկական փորձաքաննություն:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։-0-