Ողբերգական ավտովթար–վրաերթ Ջրաշխարհի մոտ. վթարի ենթարկված մեքենաներից մեկի վարորդը վրաերթի է ենթարկվել ու մահացել

ԵՐԵՎԱՆ, 10 օգոստոսի./Նովոստի–Արմենիա/. Գիշերը ողբերգական ավտովթար–վրաերթ է տեղի ունեցել Մյասնիկյան պողոտայում։

ՀՀ ԱԻՆ Փրկարար ծառայության հաղորդմամբ, ժամը 02։54-ին Ճգնաժամային կառավարման ազգային կենտրոն ահազանգ է ստացվել, որ Երևանի Մյասնիկյան պողոտայում՝ «Ջրաշխարհ»-ի մոտակայքում, տեղի է ունեցել ՃՏՊ․ ավտոմեքենան բախվել է արգելապատնեշին։

Դեպքի վայր է մեկնել Փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խումբը:

«Պարզվել է, որ բախվել են «Mercedes ML» և «Nissan Teana» մակնիշների ավտոմեքենաները, այնուհետև վարորդներից մեկը վրաերթի է ենթարկվել», – նշվում է գերատեսչության հաղորդագրության մեջ։    

Փրկարարները վարորդներին մոտեցրել են շտապօգնության ավտոմեքենաներին․ տուժածները հոսպիտալացվել են «Հերացի» թիվ 1 համալսարանական հվանդանոց, որտեղ վրաերթի ենթարկված վարորդը գիտակցության չգալով մահացել է։

Փրկարարները հոսանքազրկել են «Mercedes ML» և «Nissan Teana» մակնիշների ավտոմեքենաները և փակել գազի բալոնների փականները։-0-