ԵՐԵՎԱՆ, 31 հունվարի./Նովոստի-Արմենիա/. Գիշերը Իջևան-Երևան ճանապարհին տեղի է ունեցել խոշոր ավտովթար' հրդեհի բռնկմամբ։
Ինչպես հաղորդում է Փրկարար ծառայությունը, հունվարի 31-ին, ժամը 00:12-ին Գեղարքունիքի մարզային ճգնաժամային կառավարման կենտրոն տեղեկություն է ստացվել, որ Սևան-Գագարին ավտոճանապարհին՝ գազալցակայանի մոտակայքում, տեղի է ունեցել ՃՏՊ՝ հրդեհի բռնկմամբ:
Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։
Պարզվել է, որ Իջևան-Երևան ավտոճանապարհի 95-րդ կմ-ին «Mercedes-Benz C-Class» մակնիշի ավտոմեքենան դուրս է եկել ճանապարհի երթևեկելի հատվածից, հայտնվել դաշտամիջյան հատվածում և բռնկվել:
Հրդեհը մեկուսացվել է ժամը 00։37-ին, մարվել՝ 00:52-ին: Ավտոմեքենան այրվել է:
Մինչ փրկարարների կանչի վայր հասնելը՝ Թ. Ա.-ն (ծնված 1997 թ․) տեղափոխվել է Հրազդանի ԲԿ, այնուհետև՝ Երևանի «Սուրբ Գրիգոր Լուսավորիչ» ԲԿ, իսկ Ն. Գ.-ն (ծնված 1997 թ․)՝ Սևանի ԲԿ, որտեղ նրա առողջական վիճակը գնահատվել է ծանր կայուն։
Փրկարարներն ավտոմեքենայից մոտ 10 մ հեռավորության վրա հայտնաբերել են 3 տղամարդու դի և մոտեցրել շտապօգնության ավտոմեքենային:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
