Վարորդը երթևեկել է Հյուսիսային պողոտայի՝ հետիոտների համար նախատեսված վայրով և տեսանյութ հրապարակել. ոստիկանությունը գտել է նրան (ՎԻԴԵՈ)

ԵՐԵՎԱՆ, 15 հունիսի./Նովոստի-Արմենիա/. Օրերս սոցիալական կայքերից մեկում տեսանյութ էր տարածվել, թե ինչպես է մի մեքենայի վարորդ երթևեկում Հյուսիսային պողոտայում։ Մեքենան անցնում էր հետիոտների համար նախատեսված վայրով։ Այս մասին հաղորդագրություն է տարածել ՀՀ ոստիկանության մամուլի ծառայությունը:

«Հունիսի 15-ին ոստիկանության Կենտրոնական բաժնի համայնքային ոստիկանները ճշտեցին վարորդի ինքնությունը։ Նա նույն օրը հրավիրվեց ոստիկանություն և խոստովանեց, որ ինքն է մեքենայով ընթացել Հյուսիսային պողոտայի՝ հետիոտների համար նախատեսված հատվածով»,- նշվում է հաղորդագրության մեջ:

Ճանապարհային ոստիկանները նրա նկատմամբ կազմեցին վարչական իրավախախտման վերաբերյալ արձանագրություն։-0-