Վարդենիսում 31–ամյա տղամարդը հեռուստացույց է գողացել ու նվիրել զոքանչին (ՎԻԴԵՈ)
20:44
30 Հունվարի 2021
ԵՐԵՎԱՆ, 30 հունվարի./Նովոստի–Արմենիա/. Ոստիկանության Վարդենիսի բաժնում տեղեկություններ էին ստացվել, որ Ջաղացաձոր գյուղի 31-ամյա մի բնակիչ համագյուղացու տնից գողություն է արել, հաղորդում է ՀՀ ոստիկանության մամուլի ծառայությունը։
Քրեական հետախույզները ճշտեցին, թե խոսքը որ տան մասին է, զրուցեցին տուժողի հետ։
Պարզվեց, որ հունվարի 23-ի երեկոյան, օգտվելով նրա բացակայությունից, հարմարեցված գործիքով բացել էին տան դուռը, հափշտակել հեռուստացույց և ոգելից խմիչք։ Ըստ տանտիրոջ՝ վնասի չափը մոտ 400 000 դրամի էր։
Հունվարի 25-ին, բնակարանային գողության վերաբերյալ փաստական տվյալներ ձեռք բերելուց հետո, կասկածվողը բերման ենթարկվեց ոստիկանության Վարդենիսի բաժին:
«31-ամյա տղամարդը տվել է խոստովանական բացատրություն։ Պարզվել է, որ նա խմիչքները տեղափոխել է նույն գյուղի մեկ այլ բնակչի տուն, իսկ հեռուստացույցը նվիրել է զոքանչին։ Բնակարանային գողության փաստով հարուցվել է քրեական գործ։ Գողոնը հայտնաբերվել է։ Կատարվում է նախաքննություն», – նշվում է գերատեսչության հաղորդագրության մեջ։–0–