Վանաձորում 72–ամյա թոշակառուի դուստրը հորից 4000 դոլար և 600 հազ. դրամ է գողացել

ԵՐԵՎԱՆ, 27 փետրվարի./Նովոստի–Արմենիա/. Փետրվարի 25-ին, ժամը 17.35-ին, ոստիկանության Բազումի բաժին հաղորդում էր ստացվել, որ Վանաձորի Շինարարների փողոցի մի բնակարանից փող են գողացել, հաղորդում է ՀՀ ոստիկանության մամուլի ծառայությունը:


Դեպքի վայր մեկնած օպերատիվ խմբին 72-ամյա բնակարանատերը հայտնել էր, որ հունվարի 2-ի ժամը 17.30-ից փետրվարի 25-ի ժամը 17.00-ն ընկած ժամանակահատվածում անհայտ եղանակով մուտք են գործել բնակարան և ներքնակի տակից գողացել 4000 դոլար և 600 հազար դրամ:

«Ձեռնարկված օպերատիվ-հետախուզական և քննչական միջոցառումների շնորհիվ, գողությունը կատարելու կասկածանքով, բերման է ենթարկվել տուժողի 31-ամյա դուստրը, որը տվել է խոստովանական ցուցմունք: Նախաքննությունը շարունակվում է», – նշվում է գերատեսչության հաղորդագրության մեջ:–0–